Б.Отгонбаяр талийгч гэргийнхээ ээжид хандивын мөнгөнөөс байр авч өгчээ

Нялх биетэй эхнэр нь нас барж, хоёр сартай ихэр, 6,11,13 насны таван хүүхэдтэйгээ үлдсэн аавд туслах аян өрнөж, монголчууд хэдхэн цагийн дотор тус гэр бүлд 459 сая төгрөг хандивласан.

20-30 сая төгрөг цуглачихвал хүүхдүүдээ дулаахан байшинтай болгох л хүсэлтэй байсан өрх толгойлсон аав Б.Отгонбаяр ийнхүү 24 цагийн дотор түмнийхээ хайр энэрэлийг хүртсэн.

Хандивын мөнгөөр Б.Отгонбаяр хүүхдүүдийнхээ сургуульд ойрхон 4 өрөө байр авч тохижуулан, мөн хүүхдүүддээ хадгаламж нээж хийсэн хэмээн мэдээлж байв. Гэвч цахим сүлжээнд “Б.Отгонбаярын найзууд хандивын мөнгөнөөс хувь нэхсэн. Байрных нь хамтран эзэмшигчээр нэрээ бүртгүүлсэн, хадмууд нь хоёр өрөө байр авч өг гэсэн” зэрэг мэдээлэл гарах болсон.

Тэгвэл иргэн Б.Отгонбаяр энэ талаар “Цахим сүлжээнд явж буй мэдээлэл худлаа. Найз нөхдийг минь харлуулах ташаа мэдээлэл явж байна. Би таван хүүхэдтэйгээ байранд орсон. Байранд маань ямар нэгэн хамтран эзэмшигч байхгүй. Миний таван хүүхэд болон миний нэр дээр байгаа. Хадам ээждээ нэг өрөө байр авч өгсөн. Миний хадам ээж түрээсийн байранд амьдардаг, хөл гар муутай. Хүүхдүүдийнхээ нэр дээр хадгаламж нээсэн” хэмээлээ.