УИХ-ын чуулганы үдээс хойших хуралдаан үргэлжилж байна. Хуралдаанаар Узбекистан Улсын нийслэл Ташкент хотод Монгол Улсын Элчин сайдын яам нээн ажиллуулах тухай УИХ-ын тогтоолын төслийг хэлэлцлээ.
Узбекистан улс нь хөдөө аж ахуй, хөнгөн үйлдвэр өндөр хөгжсөн, 35 сая гаруй хүн амтай, бүс нутагтаа томоохонд тооцогдох зах зээлтэй улс. Тус улстай хүнс, хөдөө аж ахуйн салбарт хамтран ажиллаж, экспорт, импортын бараа бүтээгдэхүүний нэр төрөл, худалдааны эргэлтийг өсгөн нэмэгдүүлэх, тэр дундаа манай улсаас мах махан бүтээгдэхүүн, арьс шир, ноос ноолууран бүтээгдэхүүн гаргах бүрэн боломжтой.
Төрийн тэргүүн болон Гадаад харилцааны сайд нарын хийсэн айлчлалын үр дүнд тус улстай худалдааны эргэлтийг нэмэгдүүлэх тохиролцоонд хүрснээс гадна агаарын харилцааны болон авто тээврийн хэлэлцээрийн төслийг эцэслэн тохиолцож байгуулахад бэлэн болоод байна.
Хоёр улсын иргэд харилцан визгүй зорчдог тул аялал жуулчлалыг хөгжүүлэх таатай боломжууд бүрдэх юм гэж Гадаад харилцааны сайд Б.Батцэцэг танилцууллаа.
Тогтоолын төслийг батлах тухай санал хураахад УИХ-ын гишүүд 66 хувиар дэмжсэн тул тогтоолын төслийг баталлаа.
+ There are no comments
Add yours