Уул уурхайн орлого өсөж, Монгол Улсын төлбөрийн тэнцлийн ашиг $1 тэрбум дөхлөө

2023 оны I-XI сарын гүйцэтгэлээр хөрөнгийн данс 116.14 сая ам.долларын ашигтай гарлаа.

Төлбөрийн тэнцэл 2023 оны 11 дүгээр сарын эцсийн байдлаар 963.5 сая ам.долларын ашигтай гарсныг Монголбанк мэдээллээ. Энэ нь 2022 оны мөн үетэй харьцуулахад 2.2 дахин сайжирсан үзүүлэлт болж байна. 2022 оны 11 дүгээр сарын эцсийн байдлаар төлбөрийн тэнцэл 1.19 тэрбум ам.долларын алдагдалтай гарч байсан юм.

2023 онд гадаад худалдааны эргэлт нэмэгдэж, голлох түүхий эдийн экспорт эрс өссөнөөр урсгал данс 481 сая ам.долларын ашигтай гараад байна. Тухайлбал: барааны данс дөрвөн тэрбум ам.долларын ашигтай гарсан бол гадаадаас ирэх жуулчдын тоо нэмэгдсэнээр үйлчилгээний дансны алдагдал 2.37 тэрбум ам.доллар болж буурчээ. Үүнд тээврийн үйлчилгээний төлбөрт төлсөн дүн 745 сая ам.долларын алдагдалтай, аяллын данс 634 сая ам.долларын алдагдалтай, бусад үйлчилгээнээс 990 сая ам.долларын алдагдал хүлээсэнтэй холбоотой аж.

Хөрөнгийн дансны хувьд 116.14 сая ам.долларын ашигтай гарсан нь 2022 оны мөн үеийн үзүүлэлтээс үл ялиг буюу 16 орчим хувиар буурчээ.

Мөн 2023 онд Монгол Улсын Засгийн газар болон Хөгжлийн банкны бондын төлбөр хийсэн юм. Ингэснээр санхүүгийн данс 620.31 сая ам.долларын гарах урсгалтай байсан болохыг Монголбанк мэдээллээ. 2023 оны I-XI сарын хооронд Монгол Улсад үйл ажиллагаа явуулж буй гадаадын хөрөнгө оруулалттай аж ахуйн нэгжүүд 1.29 тэрбум ам.долларын шууд хөрөнгө оруулалт хийсэн байна. Үүний дийлэнхийг “Оюутолгой” төслийн хөрөнгө оруулалт бүрдүүлж байгааг Монголбанк онцоллоо.

Post

https://www.facebook.com/v3.3/plugins/like.php?action=like&app_id=269289457116917&channel=https%3A%2F%2Fstaticxx.facebook.com%2Fx%2Fconnect%2Fxd_arbiter%2F%3Fversion%3D46%23cb%3Df340829f34c254c%26domain%3Dgogo.mn%26is_canvas%3Dfalse%26origin%3Dhttps%253A%252F%252Fgogo.mn%252Ffdd180d496e5e%26relation%3Dparent.parent&container_width=0&href=https%3A%2F%2Fgogo.mn%2Fr%2Fkly9w&layout=button_count&locale=en_US&sdk=joey&share=true&size=large&width=