Б.Пүрэвдорж: МАН хэт олонх болбол “Долоодугаар сарын 1” дэвтагдах нь эргэлзээгүй

УИХ-ын чуулганы хуралдаанаар Сонгуулийн ерөнхий хорооны гишүүнд нэр дэвшигчийн сонсголыг хийж томиллоо. Сонгуулийн ерөнхий хорооны нэр дэвшигчээр ЦЕГ-ын дарга Т.Сүхболд, УБЕГ-ын дарга Д.Дэлгэрсайхан нар нэр дэвшсэнийг дэмжсэн юм. Сонгуулийн ерөнхий хороо орон тооны хоёр, орон тооны бус долоон гишүүнтэй бөгөөд Т.Сүхболд, Д.Дэлгэрсайхан нар  орон тооны бус гишүүнээр ажиллана.

Энэ үеэр УИХ-ын гишүүн Б.Пүрэвдорж “Сонгууль шударга болно гэдэгт эргэлзэж байна. Хоёр намын тохиролцоо хэрээс хэтэрсэн нь  иргэдийн дургүйцлийг хүргэж таарна. Өнөөдөр Улаанбаатар хотын утаа геноцитын хэмжээнд хүрсэн байна. Ногоон автобусны цавчаа, газар олголт, түгжрэл зэрэг бүгд  адгийн түвшинд очиж ард иргэдийн дургүйцлийг дээд түвшинд хүргэсэн. Энэ үед бүсчилсэн тойргийн асуудлыг хоёр намын дарга яриад л шийдчихсэн. Улаанбаатар хотод Ардчилсан нам илүү санал авах ёстой атал тэнд хоёр мандат нэмж, түүнийг нь хөдөө рүү тавьж байхад эсэргүүцэж байгаа хүн алга.

Олон жилийн турш сонгуулийг баасан гарагт явуулж ирсэн ч энэ жил заавал ажлын өдөр лхагва гарагт явуулж залуусын ирцийг бууруулах гэж байна. Ингэж нэгнийхээ өвөрт ордог явдал  ард иргэдийн дургүйцлийг хүргэж байгаа шүү. Олон намын тогтолцоотой Монгол оронд хоёрхон нам руу бүх саналыг чирч аваачих тогтолцоо хүмүүсийн дургүйцлийг хүргэнэ. ЖДҮ, концесс, Хөгжлийн банк, Боловсролын зээлийн сан, Ногоон автобус, нүүрс, төмөр замын хулгайн ард МАН бахь байдгаараа хэт олонх болбол долоодугаар сарын 1 давтагдахад  эргэлзэхээргүй болоод байна. Эрх баригчдын дураар гаргасан шийдвэр буруудвал явж, явж өөрсдөө буруугүй ЦЕГ, УБЕГ, Сонгуулийн ерөнхий хороо л буруудна шүү. Тэгэхээр сонгуулийг зөв зохион байгуулаарай” гэлээ.