Миний дүү Н.Өнөрцэцэг витамин худалдаж, олсон мөнгөөрөө байрныхаа түрээсийг өгдөг байсан

Сэтгүүлч Н.Өнөрцэцэгийн ар гэрийнхэн хэвлэлийн хурал зарлаж, мэдээлэл өглөө. Тэд Монгол Улсын Шүүх хуулиа зөрчиж Н.Өнөрцэцэгийг гадуур шалгах боломжтой байтал хорьж байгаад гомдолтой байна хэмээн хэлэв.

Н.Өнөрцэцэгийн ээж “Бидний хар бараан өдрүүд үргэлжилж байна. Охины минь хоёр хүүхдэд маш хэцүү байна. Бага хүү нь юу ч идэж уухгүй байгаа. Ард түмнээсээ тусламж хүсэж байна” гэлээ.  

Эгч Н.Өнөрбаяр “Дүүтэйгээ уулзах гэхээр зөвшөөрлийн бичиг өгдөггүй. Уг нь долоо хоногт 2 удаа зөвшөөрлийн бичгийг өгөх ёстой. Очихоор шалтаг тоочоод уулзах зөвшөөрлийг өгөхгүй байна. Холбогдох байгууллагууд энэ асуудлыг шийдэж өгөөч. Миний дүү хоригдох хэмжээний хэрэг хийгээгүй. Биднийг орон сууцтай л гэнэ. Малчин хүн орон сууцтай байж болдоггүй юм уу. Манай гэр бүлийг маш сайн шалга, банкны зээлийн гэрээ л гарч ирнэ. Дүү маань байр түрээсэлдэг байсан. Витамин худалдаж олсон мөнгөөрөө түрээсийнхээ мөнгийг өгдөг байсан шүү дээ” гэв. 

Сэтгүүлч Өнөрцэцэгийн дүү “Эгчийг минь өнөөдөр суллах ёстой байсан. Гэтэл 30 хоногийн хугацаанд 10 гаруй шүүх хурал болсон ч одоог хүртэл суллаагүй. Миний эгч Монгол Улсад маш их хувь нэмэр оруулсан гэж бодож байна. Жишээ нь ЖДҮ, Хөгжлийн банкны хэргийг нийтэд ил тод болгож, мэдээлсэн. Үүний хор уршгийг торны цаана мэдрээд байж байна. Гэхдээ миний эгч ч гэлтгүй хүн бүр төгс биш. Найман ишигний хэрэг, хүнийг гүтгэсэн гэх хэрэгт нь шалгаж болно. Гадуур шалгаж болно шүү дээ. Хэрэг шийдэгдэх хүртэл туслах хүмүүс, холбогдох байгууллагуудын өмнө өвдөг сөгдөн гуйх болно” гэлээ.