Автобус худалдан авах тендерийн гэрээг шалгарсан компанитай өнөөдөр байгуулсан байна. Энэ талаар Нийслэлийн Засаг даргын орлогч П.Сайнзориг мэдээлэл өглөө.
Гэрээ байгуулагдсанаар ирэх оны Нэгдүгээр сарын 30-ны өдөр хүртэл 600 автобусыг хүлээж авахаар болж байгаа юм байна. Ингэхдээ үйлдвэрлэгдээд бэлэн болсон автобуснуудыг 50, 50-аар нь оруулж ирэх учир энэ ондоо багтаад тодорхой тооны шинэ автобустай болно, яаралтай үйлчилгээнд гаргана гэв.
Автобуснуудыг Монгол Улсын хилээр орж ирэхээс өмнө урьдчилсан хяналт тавина гэдгийг үйлдвэрлэгч компанитайгаа тохирсон байна.
Баталгаат хугацаа 24 сар байх бөгөөд цаашид ашиглалтын 10 жилийн хугацаанд сэлбэг хэрэгслээр найдвартай хангах үүргийг үйлдвэрлэгч тал хүлээж байгаа юм байна.
Нийслэлийн Засаг даргын орлогч П.Сайнзориг “Нийтийн тээвэрт үүсээд байгаа энэ нөхцөл байдлаас нийт Улаанбаатарчуудаасаа хүлцэл өчиж байна. Түргэн шуурхай энэ гэрээний хэрэгжилтийг зөв зохион байгуулна. Гэрээ хийхээс өмнө тендер сонгон шалгаруулалт дээр гомдол гарсан. Сангийн Яам хянаад тодорхой бүрдэл хангагдаагүй байна гэсэн байдлаар гомдлуудыг буцаасан. Даваа гарагаас эхлээд шалгарсан компанитайгаа хэлэлцэж өнөөдөр гэрээгээ байгууллаа.
Авлигатай Тэмцэх Газраас “Тэнүүн Огоо” компанийн хэрэгтэй холбогдуулаад улсын төсөвт учирсан хохиролд тус компанийн үл хөдлөхийг санал болгож байна гэсэн. Бид гараж зэрэг нийтийн тээврийн үйлчилгээтэй холбоотой объектуудын авахаар болсон” гэв.
+ There are no comments
Add yours