Урт цагааныг нийслэлийн өмчөөс хассанаар ногоон байгууламж барих болов

Нийслэлийн Иргэдийн төлөөлөгчдийн хурлын ээлжит ХХ хуралдаан өчигдөр /2023.12.06/ болж, Урт цагааныг нийслэлийн өмчөөс хассан байна.Нийслэлийн Засаг даргын нэгдүгээр орлогч П.Сайнзориг Урт цагааны барилгын суурин дээр ногоон байгууламж барина гэж мэдэгдэв.

Нийслэлээс өнгөрсөн арваннэгдүгээр сард долоо хоногийн хугацаатай олон нийтийн дунд санал асуулга явуулахад 3262 хүн саналаа өгснөөс 3122 буюу 96 хувь нь цэцэрлэгт хүрээлэн, ногоон байгууламж байгуулахыг дэмжсэн юм. Гэхдээ Нийслэлийн Иргэдийн төлөөлөгчдийн хурал дахь Ардчилсан намын бүлэг, ХҮН намын төлөөлөгч нарын зүгээс “Урт цагааныг сэргээн завсарлах хэрэгтэй.  3262 иргэний санал бол нийслэлчүүдийг төлөөлөх хангалттай төлөөлөл биш. Мэргэжлийн хүмүүсийнхээ үгийг сонсох ёстой” гэдэг байр суурь илэрхийлж байсан удаатай. Харин Нийслэлийн Засаг дарга бөгөөд Улаанбаатар хотын захирагч Х.Нямбаатар “3262 иргэний санал гэдэг бага биш. Урт цагааныг буулгах уу, хэвээр нь үлдээх үү гэдгийг НИТХ-аар дахин хэлэлцэнэ” гэж мэдэгдсэн. Гэвч Урт цагааныг нийслэлийн өмчөөс хасах шийдвэр гаргаснаар нурааж, ногоон байгууламж барих болж байна.