Сахал хочит Должингийн Эрдэнэбилэгийг зөвхөн Худалдаа хөгжлийн банкны хамгийн их хувьцаа эзэмшигчээр харах нь хэт өрөөсгөл. Улаанбаатар санг банк болгож өргөжүүлж, өөрийн болгосон цагаас Должингийн Эрдэнэбилэг гэдэг хүний улс төр бизнесийнхэнтэй хамтарч монголыг хэрсэн эрх мэдлийн Э бүлэглийг бий болгож Хөтөлийн цементийн үйлдвэр, Дарханы Төмөрлөгийн үйлдвэр, Багануурын уурхай, Эрдэнэтийн 49 хувь… зэргээр төрийн өмчит бүхий л үйлдвэрт хувьчлал нэрээр шургаж, бүгдэд эзэн суусны ард Цахиагийн Элбэгдорж, Миеэгомбын Энхболд, Зандаахүүгийн Энхболд гэсэн Монголын төрийн өндөр албан тушаалыг ээлж дараалан хашсан МАНАН бүлэглэлийнхэн, тэднээр дамжуулж бизнесээ тэлдэг улс төрчдийн суганд наалдсан “нүүдэлчид” хоорондын ашиг сонирхолын сүлжээ Монгол Улсын эдийн засгийн өнөөдрийн хүнд нөхцөл байдлын эх үүсвэр болж байгаа гэхэд хэтрүүлсэн болохгүй юм.
Ерөнхий сайд агсан Ж.Наранцацралтын үед анх байгуулагдсан Улаанбаатар сан М.Энхболдыг Улаанбаатар хотын даргаар ажиллах үед Улаанбаатар банк болж томорсон ч нэг л мэдэхэд тус банкны 99.9 хувийн эзэмшигч эзнээр Д.Эрдэнэбилэг гэгч хүн гарч ирсэнээр бизнесийн болон улс төрийнхөний хүрээнд анх орж ирсэн байдаг. Улаанбаатар банкны хувьцааны 75 хувь нь нийслэлийн, 25 хувь нь Т.Бадамжунай тэргүүтэй “хотын фракц”-ынханы мэдэлд байсан хэдий ч ямар эрх мэдэл, тохиролцоогоор Д.Эрдэнэбилэг гэгчийн халаасанд бүрэн орсоныг хэн ч мэддэггүй, өнөөдрийг хүрсэн нь гайхалтай. Учир нь Д.Эрдэнэбилэгийн “Х.Баттулгын хувийн туслах, хамгаалагч, жолооч” гэж ойлгодог байсан хүмүүст түүнийг Улаанбаатар банкны ЭЗЭН болоход цочирдож гайхсан ч бүх зүйл хоцорсон байсан гэж хэлж болно.
Д.Эрдэнэбилэгийн хувьд “банк залгих” ажиллагаа нь цааш үргэлжилж төрийн мэдэлд 70 хувь нь байсан Худалдаа хөгжлийн банкны хувьчлалд 2003 онд оролцсоноор өөрийн болгож авсан бөгөөд тухайн үеийн Ерөнхий сайдаар ажиллаж байсан Н.Энхбаярын хөрөнгийн хүч дутсан гэхээр ямар том санхүүжилттэй байсныг төсөөлж болохоор мэт. Учир нь 2003 он бол Н.Энхбаярын хувьд “бүх юмны хаан” байсан үе бөгөөд түүний шийдвэрээс зөрөх хүнгүй байхад Д.Эрдэнэбилэг тэргүүтэй улс төр, бизнесийн бүлэглэл сөрж базаж байсан гэхээр яг энэ цаг үеэс Монголын улс төрийн МАНАН бүлэглэлийн суурийг тавигдсан гэж үзэж болохоор байгаа юм.
2015 онд З.Энхболд УИХ-ын даргаар ажиллаж байхад мөн оны долдугаар сарын 3-нд батлуулсан 70 дугаар тогтоолоор 2015-2016 онд хувьчлах төрийн өмчийн компаниудын чиглэлд Хөтөлийн цемент шохойн үйлдвэр багтаж 1.3 тэрбумаар хувьчлагдах зам засагдсан байдаг. Ингэж Төрийн өмчийн хорооны дарга Ц.Нанзаддоржийн шийдвэрээр 50 сая тоннын нөөцтэй Хөтөл цементийн үйлдвэрийг дөрвөн өрөө байрны үнээр хувьчилсан нь ил болсон юм. Харин энэ ажлыг гардан машид сайнаар гүйцэтгэсэн Ц.Нанзаддорж нь Монголын хэрсэн Э бүлэглэлээс ээлжит шагналаа авсан нь Үндсэн хуулийн цэцийн гишүүн гэх өндөр цалинтай, хангамж өндөр албанд томилогдсон явдал байлаа.
2016 оны зургадугаар сарын 28-нд УИХ-ын сонгуулийн өмнөх өдөр ОХУ-ын Ротех компанийн мэдэлд байсан Эрдэнэт үйлдвэрийн 49 хувийг Д.Эрдэнэбилэг тэргүүтэй бизнесийн төлөөллүүд 500 сая ам.доллараар худалдаж авсан нь Монгол Улс эдийн засгийн хямралд орсон үед бол маргаангүй гавьяатай үйл явдал хэдий ч нэг сая төгрөгийн дүрмийн сантай 2014 онд байгуулагдсан компанид 200 сая ам.долларын зээл олгох замаар Эрдэнэтийн 49 хувийг худалдаж авсан нь сонирхол татахаас аргагүй юм. Учир нь энэхүү санхүүжилтын тодорхой хувийг Хөгжлийн банкнаас авсан санхүүжилтээр зээлээр санхүүжүүлсэн асуудал яригддаг…
Үргэлжлэл бий…
