“Тэтгэврийн шинэчлэлд хоёр мянга гаруй ахмад настан хохирсон”

Тэтгэврийн шинэчлэлд хохирогч ахмадууд Засгийн газарт шаардлага хүргүүлэх талаар “Үндэсний мэдээллийн төв”-д мэдээлэл хийлээ.

Ахмадуудын төлөөлөл” Миний бие насаараа үйлдвэрт ажиллаж нийгмийн даатгал төлсөн. Надтай ижил олон ахмадууд тухайн үед төрийн ачааг үүрж байсан. Гэтэл өнөөдөр бид ажилласан жилийнхээ хариуд авах ёстой тэтгэврээ авч чадахгүй байна. Тэтгэврийн шинэчлэлийн хүрээнд маш олон ахмадууд хохирсон байгаа. Тухайлбал, 2023 оны зургаадугаар сарын 21-нд гарсан тогтоолын дагуу  итгэлцүүрээр цалин нэмж, 10 хувиар нэмэх шийдвэр гарсан. Тухайн үед ахмадууд тэтгэвэр нэмэгдлээ гээд маш их баяртай байсан. Гэтэл миний тэтгэвэр 4000 төгрөгөөр л нэмэгдсэн байсан. Учир нь бидний итгэлцүүрээр өсгөсөн цалинг хэдэн арван жилийн өмнөх буюу 2013 оны цалингийн дээд хязгаараар тасалж тэтгэвэр тогтоосон байсан.

Иймд Үндсэн хууль зөрчиж ахмадуудыг ялгаварлан гадуурхаж байгааг бид эсэргүүцэж байна. Энд ингэж бага тэтгэвэр авч байгаа ахмадууд бүгд тухайн цаг үед эд бүтээн байгуулалтын эрэн үед ажиллаж байсан хүмүүс. Тиймээс бидний тэтгэврийг шударгаар тогтоохыг хүсэж байна. Ахмадууд тэтгэврээрээ үр хүүхдүүддээ чихэр авч өгч, хүний нүүр харахгүй амьдрах ёстой. Гэтэл одоо өгч байгаа тэтгэвэр өнөөдрийн зах зээлд юунд ч хүрэхгүй байгаа. Энгийнээр бол 13 жилийн өмнөх цалингаар өнөөдөр амьдруулна гэдэг байж боломгүй зүйл. Иймд бид төр засгаас хариулт хүлээж байна. Удахгүй ахмадуудын баяр болно. Тухайн үед төр засаг бидний шаардлагыг хүлээж авч шийдвэрлэх байх гэдэгт итгэж байна. Хэрэв энэ асуудал шийдэгдэхгүй бол хөдөө орон нутаг, нийслэлд байгаа мянга, мянган ахмадууд өөрсдийнхөө төлөө жагсаж, тэмцэнэ” гэлээ.