Б.Ёндонжамц: Драгон авто вокзалыг нүүлгэх шийдвэрээ эргэж харахыг хүсэж байна

Хот хоорондын тээвэр эрхлэгчдийн холбооноос авто вокзалыг нүүлгэн шилжүүлэхтэй холбоотой асуудлаар өнөөдөр сэтгүүлч нарт мэдээлэл өглөө.

Энэ талаар Хот хоорондын тээвэрчдийн холбооны тэргүүн Б.Ёндонжамц “Драгон авто вокзалыг нүүлгэх шийдвэр ЗТХЯ-наас гарсантай холбогдуулан мэдээлэл өгөх гэж ирлээ. Тус авто вокзал 2001 онд байгуулагдсанаас хойш өдийг хүртэл одоогийн байршилдаа үйл ажиллагаа явуулж байна.

Одоо Драгонд хувийн хэвшлийнхэн хөрөнгө оруулалт хийгээд стандарт хангасан авто вокзал барих ажлыг энэ оны тавдугаар сараас эхлүүлээд байна. Уг авто вокзалаас орон нутгийн 30 гаруй чиглэлд зорчигч тээврийн автобус явдаг. Драгон авто вокзалыг стандартын дагуу нүүлгэхийг эсэргүүцэхгүй. Гэхдээ тавдугаар баазын цаана буй Номин Холдингийн агуулах руу нүүлгэх шийдвэр гараад байна. Тэнд стандартын бус, гурван чиглэлд богино эргэлтийн автобус явдаг газар. Драгон авто вокзалыг нүүлгэх шийдвэр нь иргэд, үйлчлүүлэгчийг хохироосон шийдвэр байна.

Драгон Холдингийн нэгдүгээр давхар Автотээврийн Үндэсний Төвийн өмчид шилжсэн байдаг. Гэтэл энэ өмч хөрөнгөө орхиод өөр тийш нүүлгэх гээд байгааг гайхаж байна. Драгон авто вокзалыг нүүлгэх шийдвэрээ эргэж харахыг хүсэж байна” хэмээн ярилаа.