ШЕЗ: Нүүрсний хэрэгт төрийн өндөр дээд албан тушаалтанд холбогдуулан шийдсэн хэрэг байхгүй

Эрүүгийн хэргийн анхан шатны гурван шүүхэд нүүрсний гэх тодотголтой 5 хэргийг хянан шийдвэрлэжээ. Тодруулбал, Өмнөговь аймгийн Ханбогд сумын шүүхээр нүүрсний гэх тодотголтой гурван хэрэг, СХД-ийн шүүхэд 1, Баянгол дүүргийн Эрүүгийн хэргийн анхан шатны шүүхэд нэг тус бүр хянажээ.
Энэ талаар албаны хүн хэлэхдээ “Эдгээр хэрэгт төрийн өндөр дээд албан тушаалтанд холбогдуулан шийдсэн хэрэг байхгүй. Дийлэнхэд нь торгох ял оногдуулж нийтийн албанд томилогдох эрхийг нь хасах нэмэгдэл ял шийтгэл оногдуулсан” гэлээ. Дараа нь Нэр дурдагдаж буй хүмүүс шалгагдаж байгаа юу? гэх сэтгүүлчийн асуултад “Хянан шийдвэрлэсэн хэрэгт УИХ-ын нэр бүхий гишүүдэд нүүрсний гэх хэрэгтэй холбоотой хэргийг өнөөдрийн байдлаар шүүх дээр хүлээж аваагүй. Эцэслэн шийдвэрлээгүй, шүүхийн өмнөх шатанд хяналт бүртгэлийн мэдээллийг манайхаас өгөх боломжгүй” гэлээ.
Нүүрсний хэрэгт холбогдуулан 37 хүнд таслан сэргийлэх арга хэмжээ авагдсан байна. Давхардсан тоогоор 6 хүнд тодорхой үйл ажиллагаа явуулах, албан үүргээ биелүүлэхийг түдгэлзүүлэх, 26 хүнд хязгаарлалт тогтоох, 16 хүнд цагдан хорих арга хэмжээ авчээ.
Давж заалдах шатны шүүхэд 10 хүнд холбогдох 2 хэрэг ирснээс 5 хүнд холбогдох 1 хэргийг шийдвэрлэж 5 хүнд холбогдох 1 хэрэг хянан шийдвэрлэх ажиллагаанд байна.