“Japan airlines”, “ThaiViet jet” компани Монгол руу нислэг үйлдэж эхлэв

Засгийн газар 2023-2025 оныг Монголд зочлох жил болгож зарласантай холбогдуулан агаарын тээврийн либералчлалыг эрчимжүүлэх бодлого баримталж буй. Үүний хүрээнд нислэгийн давтамжийг нэмэгдүүлэх, шинэ маршрутууд нээх чиглэлийн хэлцлүүдийг улс орнуудтай хийсээр байгаа юм. Эл хэлцлийн үр дүнд олон улсын агаарын тээврийн хоёр томоохон компани энэ сараас манай улс руу шууд нислэг үйлдэж эхлэв. Тодруулбал, Японы “Japan airlines” компани зургадугаар сарын 1-нд Нарита-Улаанбаатар чиглэлд анхны захиалгат нислэгээ үйлдсэн бол Тайландын “ThaiViet jet” өчигдрөөс Бангкок-Улаанбаатар чиглэлд зорчигч тээвэрлэж эхэлснээ зарлалаа.

“Japan airlines” компанийг Монгол руу шууд нислэг үйлддэг болгох асуудлыг хоёр улсын төлөөлөгчид энэ оны эхээр хэлэлцсэн нь ийнхүү таван сарын дараа ажил хэрэг болов. Тус компани HIS, JTB, “Club tourism”, “Nip­pon travel”, “Hankyu” зэрэг агентлагаас санал болгож буй хөтөлбөрт аяллын дагуу захиалгат нислэг үйлдэх юм байна. Наймдугаар сард гэхэд дөрвөн шөнө, таван өдрийн хугацаатай, хоёр талын нислэгтэй хөтөлбөрт аялалд 400 орчим зорчигч хамруулахаар төлөвлөөд буй аж.

“ThaiViet jet” 165 хүний суудалтай, “Air­bus A-321” загварын агаарын хөлгөөр долоо хоногт нэг удаа хуваарьт нислэг үйлдэх нь. Өмнө нь эл чиглэлд “МИАТ” ТӨХК зөвхөн аравдугаар сараас дөрөвдүгээр сар хүртэлх хугацаанд улирлын чанартай нислэг үйлддэг байсан бол цаашид жилийн бүх үед зорчих боломж бүрдэв. Ташрамд дурдахад, холбогдох байгууллагууд АНУ, Кувейт, Катар зэрэг улсын агаарын тээвэрлэгчдийг Монгол руу шууд нислэг үйлдүүлэхээр ажиллаж байгааг албаны хүмүүс .