“Самурай бондын эргэн төлөлтийн эх үүсвэрийг бүрдүүлж, хадгалсан. Евро бондын хувьд төлөвлөгөө гаргаад ажиллана”

Гэрэгэ бондын төлбөрийг бүрэн төлж барагдуулсан талаар Сангийн сайд Б.Жавхлан мэдээлэх үеэр бусад бондын төлбөрийн талаар нэмж мэдээлэл өгөв.

Тэрбээр “Засгийн газрын баталгаатай болон баталгаагүй Хөгжлийн Банкны бондууд бий. Тодруулбал,

Есдүгээр сарын 25-нд төлөгдөх “Евро” бонд
Арванхоёрдугаар сарын 25-нд төлөгдөх “Самурай” бонд /Засгийн газрын баталгаатай/
“Самурай” бондын эргэн төлөлтөд санаа зовох зүйлгүй. Валютын эх үүсвэрийг нь бүрдүүлээд хадгалчихсан.

Харин “Евро” бондын хувьд төлөвлөгөө гаргаад ажиллаж байна. Тус бондын үлдэгдэл 500 сая ам.доллар байснаас өнгөрсөн долоо хоногт 86 сая ам.долларыг төлөөд одоо 414 сая ам.долларын үлдэгдэлтэй. Есдүгээр сар хүртэл бондын буцаан худалдан авалтуудаа хийгээд төлбөрөө барагдуулаад явна.

Хөгжлийн Банкны хувьд үүнийг төлөх төгрөгийн эх үүсвэрээ өөрсдөө бүрдүүлэхээр харагдаж байгаа. Гагцхүү энэ төгрөгөөрөө валют худалдаж аваад гадагш худалдан авалт хийх ёстой. Тиймээс валютын нөөцөд анхаарч ажиллах шаардлагатай” гэв.