ГХЯ авлигын хэрэгт яллагдагчаар татагдаж байсан хүнийг Хөх хотод консулаар томилжээ

Засгийн газрын өнөөдрийн хуралдаанаар зарим улсад суух Элчин сайд, Консулын газрын дарга нарыг эргүүлэн татах, шинээр томилох асуудлыг хэлэлцэж, БНХАУ-ын Хөх хотод суух консулаар Сэлэнгэ аймгийн Засаг дарга асан Ш.Оргилыг томилохыг дэмжсэн.

Тэгвэл Хөх хотод суух консулаар томилогдох гэж буй Ш.Оргил нь Сэлэнгэ аймгийн Засаг дарга байхдаа авлига, албан тушаалын хэрэгт шалгагдан яллагдагчаар татагдаж байсан нэгэн юм байна.

Тодруулбал:

-Хурандаа А.Энхбатын хамт иргэдийн хууль бусаар түүсэн их хэмжээний дэрвэгэр жиргэрүү ургамлыг хурааж аваад хамаарал бүхий этгээддээ хямд үнээр худалдан борлуулсан, худалдаж авсан хамаарал бүхий этгээд нь цааш хятадуудад өндөр үнээр дамлан худалдаалж ашиг олсон.

-Сэлэнгэ аймагт үйл ажиллагаа явуулах зөвшөөрөл хүссэн БНХАУ-ын хөрөнгө оруулалттай компаниас 10 сая төгрөгийн авлига авсан.

-Хамаарал бүхий этгээдийнхээ эзэмшлийн газар дээр БНХАУ-ын хөрөнгө оруулалттай компаниар нийт 200 сая төгрөгийн өртөгтэй элс, хайрга асгуулж, тэгшлүүлж, талбай засуулсан зэрэг албан тушаалаа урвуулан ашигласан, авлига авсан үйлдэлд нь эрүүгийн хэрэг үүсгэж, яллагдагчаар татсан талаар хэвлэлд мэдээлэгдэж байжээ.