“Хүнсний хангамж, аюулгүй байдал” үндэсний хөдөлгөөний хүрээнд “Гаалийн байгууллага болон хүнс, хөдөө аж ахуй, хөнгөн үйлдвэрийн салбарын баялаг бүтээгч, үйлдвэрлэгч нарын уулзалт хэлэлцүүлэг” өнөөдөр Гаалийн ерөнхий газарт боллоо.
2021 оны дөрөвдүгээр сарын 23-ны өдрийн “Нэмэгдсэн өртгийн албан татвараас чөлөөлөх тухай” хууль, Засгийн газрын 2021 оны тавдугаар сарын 12-ны өдрийн 143 дугаар тогтоолоор “Импортоор оруулж байгаа болон дотоодод борлуулсан хөдөө аж ахуйн зориулалттай шинэ трактор, комбайн, машин механизм, усалгаа, хүлэмжийн тоног төхөөрөмж, ойн болон шувууны аж ахуйн техник, тоног төхөөрөмж, бордоо, ургамал хамгааллын бодисын жагсаалтын хоёрдугаар хавсралтаар батлаад буй. Энэ хуулийн хүрээнд,
2021 онд 187 ААН, иргэн хамрагдаж 28.5 сая долларын үнийн дүн бүхий бараанд ногдох 12.5 тэрбум төгрөгийн
2022 онд 189 ААН, иргэн хамрагдаж 44.1 сая долларын үнийн дүн бүхий бараанд ногдох 14.6 тэрбум төгрөгийн татварын чөлөөлөлтөд хамрагджээ.
Энэхүү хууль 2025 оны нэгдүгээр сарын 1-н хүртэл үйлчлэх бөгөөд шинэ трактор, комбайн, машин механизм, техник, тоног төхөөрөмж байхаар хуульчилсан болохыг тус байгууллагаас мэдээлээ.
Гаалийн ерөнхий газрын Гаалийн тариф, татварын газрын улсын ахлах байцаагч Б.Эрдэнэбатаас тодруулахад “Хүнс, хөдөө аж ахуйн гаралтай түүхий эд боловсруулах зориулалттай, тухайн үйлдвэрийн үндсэн хөрөнгөөр бүртгэгдэх 19 салбарын шинэ тоног төхөөрөмжийг 2027 оны нэгдүгээр сарын 1-ний өдөр хүртэл хугацаанд импортын барааны гаалийн албан татвараас хөнгөлөх ба тоног төхөөрөмжид тухайн онд ногдуулан төлсөн гаалийн албан татварыг дараагийн төсвийн жилийн эхний улиралд татвар төлөгчид буцаан олгохоор хуульчилсан.
Гаалийн албан татварыг хөнгөлөх тухай хуулиар Хүнс хөдөө аж ахуйн гаралтай түүхий эд боловсруулах зориулалттай, тухайн үйлдвэрийн үндсэн хөрөнгөөр бүртгэгдэх шинэ тоног төхөөрөмжийг импортын барааны гаалийн албан татвараас 100% хөнгөлөх шийдвэр гаргаж, хөнгөлөгдөх барааны жагсаалтыг баталсан.
Анхаарах гурван зүйл:
Хуулиараа тоног төхөөрөмж нь шинэ байх ёстой
Тухайн импортлогчийнхоо үндсэн хөрөнгөд бүртгэгдсэн байх ёстой
Тоног төхөөрөмжид тухайн онд ногдуулан төлсөн гаалийн албан татварыг дараагийн төсвийн жилийн эхний улиралд татвар төлөгчид буцаан олгоно” гэлээ.
Импортын барааны гаалийн албан татвараас хөнгөлөх хүнс, хөдөө аж ахуйн гаралтай түүхий эд боловсруулах зориулалттай үйлдвэрийн жагсаалт:
Сүү, сүүн бүтээгдэхүүний үйлдвэр
Жимс, жимсгэнэ боловсруулах үйлдвэр
Ундааны үйлдвэр
Давсны үйлдвэр
Мал төхөөрөх болон махны үйлдвэр
Хиам, консервын үйлдвэр
Консервын лаазны үйлдвэр
Кетчуп, майонез, ургамлын тосны үйлдвэр
Төрөл бүрийн хүнсний ногоо нөөшлөх үйлдвэр
Гурилын үйлдвэр
Талх, нарийн боовны үйлдвэр
Сав, баглаа боодол хийх, савлах үйлдвэр
Шувууны аж ахуй
Зөгийн аж ахуй
Ноос, ноолуур боловсруулах, нэхмэл, сүлжмэл, оёмол бүтээгдэхүүний үйлдвэр
Арьс, ширний үйлдвэрлэл
Модон бүтээгдэхүүн тавилгын үйлдвэр
Боловсруулах үйлдвэрийн бохир ус цэвэрлэх байгууламж эрдэс бордооны үйлдвэр
Эрдэс бордооны үйлдвэр хамаарах аж.
+ There are no comments
Add yours