Х.Ганхуяг: Намайг гэмт хэрэгт хатгаж оролцсон гэх юм

“Хөгжлийн банкны” гэх хэргийн гэм буруугийн шүүх хуралдаан үргэлжилж байна.

Шүүгдэгч, УИХ-ын гишүүн Х.Ганхуяг “Намайг гэмт хэрэгт хатгаж оролцсон гэх юм.  Би Хөгжлийн банканд нэг ч хүн танихгүй шүү дээ. Г.Амартүвшин бид хоёр Банкны тухай хууль батлахад л нэг ажлын хэсэгт хамтран ажилласан. Гэтэл хатгагчаар оролцсон гэх мэтээр сошиал дарамтад ороод хүнийг гүтгэчихдэг юм байна. Эсхүл гоё зохиол ч юм шиг, би үүнийг ойлгохгүй байна.

Вертекс майнинг партнер ХХК Хөгжлийн банкны зээлтэй холбоотой санхүүжилтийг төлсөн. Зөвхөн хүүнд 10 гаруй тэрбум төгрөг төлсөн юм билээ. Ковидын хүндрэлийн үед нэг ч удаа хүүгээ таслаагүй. Ер нь явж, явж зээлдээ хариуцлагатай хандаж, хугацаандаа төлсөн хоёр л компани байдаг юм билээ. Үүний нэг нь. Гэтэл яагаад гэмт хэрэг болоод яагаад хохиролтой юм. Би үүнд ер нь ямар холбоотой юм бэ” гэж асуув.

Прокурорын зүгээс “Таны ээжийн үүсгэн байгуулсан Вертекс майнинг партнер ХХК  бий. Энэ компанийн 98 хувийг нь та эзэмшдэг. Тус компани хөгжлийн банкнаас 33 тэрбум төгрөгийн зээл авч, тухайн банканд их хэмжээний хохирол учруулсан.

Вертекс майнинг партнер ХХК-аар Хөгжлийн банкнаас зээл авах зорилгоор та тухайн үеийн Хөгжлийн банкны гүйцэтгэх захирлын албан үүргийг гүйцэтгэгч Г.Амартүвшинд нөлөөлж, хатгагчаар оролцсон гэдэгт таныг буруутгаж байгаа юм” гэж хариу тайлбарлалаа.