Д.Кёкүшюзанбатбаяр хулдаасан хэвлэлийг хутгаар зүсэж, танхайрсан гэх хэргийг шалгаж эхэлжээ

Хан-Уул дүүргийн цагдаагийн хэлтэст Д.Кёкүшюзанбатбаяр хутга барьж, танхайрсан гэх гомдол ирснийг цагдаагийн байгууллагаас мэдээлэв.

Тодруулбал, энэ сарын 2-ны өдөр “Грийнхаус” хотхоны СӨХ-ны дарга С.М нь тус хотхонд Д.Кёкүшюзанбатбаяр, Т.Баясгалан нар зөвшөөрөлгүй барилга барьж байгааг эсэргүүцэн 2х6 метрийн хэмжээтэй хулдаас байршуулжээ.

Уг хулдаас дээр “Д.Кёкүшюзанбатбаяр, Т.Баясгалан нар “Грийнхаус” хотхоны байрны булан тохой бүрд, Токио тауэр, спорт заал, таун хаус, 14 айлын орон сууц, Кёкүшюзан сан хэмээх таван барилга бариад бүгдийг нь зарж дуусгасан.

Одоо “Грийнхаус” хотхоны урдах спорт заал, орон сууцыг нурааж, 14 давхар оффисын барилга барих гэнэ. Хотхоны 300 гаруй оршин суугчдын эрх ашиг зөрчигдөх юм.

Барилга барихыг эсэргүүцэж байна. Зогсоох хүртэл бид тэмцэх болно” хэмээн бичжээ.

Энэхүү хулдаасан хэвлэлийг иргэн Д.Кёкүшюзанбатбаяр ирж хутгаар зүсэж, авч явж танхайрсан гэж өргөдөл гаргасныг цагдаагийн байгууллагаас шалгаж байгаа аж.