“Алтай түншлэл 88” төсөл хэрэгжүүлэх малчдын төлөөлөл Монгол улсын анхны арьс шир боловсруулах үйлдвэр “Булигаар” ХК-тай танилцлаа. Тус үйлдвэр нь 1934 байгуулагдаж одоогийн үйлдвэр нь 1976 онд БНСЧУ-ын техник эдийн засгийн тусламжаар жилд 375 мянган бодын шир үйлдвэрлэх зориулалттайгаар ашиглалтад орсон байна. Улмаар 1995-1998 онуудад техник, технологийн иж бүрэн шинэчлэлт хийн жилд 500 мянган бодын шир гүйцэт боловсруулах буюу 1,150 мянган квадрат метр эцсийн боловсруулалт хийсэн арьс шир болон 2,2 сая богийн арьс гүн боловсруулалт хийхээр 1998 оны 12-р сард ашиглалтад оржээ.
Анх 1991 онд их хувьчлалаар Булигаар ХК нь нэг бүрийн үнэ нь 100 төгрөгийн үнэтэй 260,000 хувьцаа гарган 26,000,000 төгрөгөөр өөрийн үйлдвэрийн байраа үндсэн хөрөнгөөр үнэлж хувьчлагджээ. Тус компани нь бод, богийн арьсыг хагас болон гүйцэт боловсруулан вэт-блю, краст, булигаар, гялгар хром, артай хар хром, гутлын дотор зэргийг үйлдвэрлэн дотоод болон гадаадын зах зээлд борлуулдаг бөгөөд үндсэн хэрэглэгчид нь Монгол улсын гутлын үйлдвэрлэлийн үйл ажиллагаа эрхэлдэг компаниуд юм.
Булигаар ХК-ийн үйл ажиллагаатай танилцсаны дараа малчдын төлөөлөл Монгол улсад байгуулагдсан гутлын анхны хувийн үйлдвэр болох “Хос Аз” компанитай танилцлаа.
Малчдын тухайд “Малын гаралтай түүхий эдээс хамгийн их хаягддаг нь арьс шир байдаг. Арьс ширний арвин нөөц байна. Үнэгүй хэвтэж байдаг түүхий эдүүдээ ашиглаж үйлдвэрлэл эрхэлснээр дотоод гадаадын зах зээлд гаргаж, ашигтай ажиллах боломж байна. Хамгийн гол нь саалиа бэлдэхээр саваа бэлд гэдэг. Малаа эрүүлжүүлж, малын гоц халдварт болон шимэгчийн гаралтай өвчнөөс урьдчилан сэргийлж, тарилга туулгалтыг тогтмол хийлгэн элдэв гэмтэлгүй, чанартай түүхий эд бэлтгэх хэрэгтэй юм байна.” гэдгийг илэрхийлж байлаа.
