О.Цэрэнтогтох: Х.Болорчулуун сайд нүүрсний хулгайтай холбоотой байж болзошгүй

Авлигатай тэмцэх газарт иргэдийн төлөөлөл О.Цэрэнтогтох Хүнс хөдөө аж ахуй хөнгөн үйлдвэрийн сайд Х.Болорчулууны гэмт хэргийн шинжтэй авлига, албан тушаалын хэргүүдийг шалгуулахаар хандаж буй талаар мэдээллээ. Тэрбээр,

-Хүнс хөдөө аж ахуй хөнгөн үйлдвэрийн сайд Х.Болорчулуунтай холбоотой баримтуудыг цахим мэдээллийн хэрэгслээр цацагдсан мэдээлэлтэй холбож цуглуулсан. Нийт 6 баримтаас хамгийн анхаарал татаж байгаа нь, Дорнод аймгаас сонгогдсон Хүнс хөдөө аж ахуй хөнгөн үйлдвэрийн сайд Х.Болорчулуун нь Дорнод бүсийн эрчим хүчний станцтай салшгүй холбоотой нь нотлогдож байна. Энэ нь 2022 оны арваннэгдүгээр сарын 14-нд “Эргэлт.мн” сайтад гэмт хэргийн шинжтэй мэдээлэл цацагдсан. Үүнийг та бүхэн мэднэ байх. Тус станцын дарга нь түүний худ ургийн хамаарал болох Отгонбаатар гэж хүн бий. Ерөнхийдөө 2018 оноос хойш 18 тендерийг зөвхөн өөрийн хамаарал бүхий төрсөн дүүгийнхээ болон бусад хамаарал зээ дүү зэргээр дамжуулан авсан. Зээ дүүгийнх нь нэр дээр байх компани нь 2021 онд барилгын тусгай зөвшөөрөл авч, эрчим хүчний станцад бараа нийлүүлэх тусгай зөвшөөрлийг 2022 онд авсан. Гэвч 2021-2022 онд нийт 8 тендер авсан гэх мэдээлэл гадуур цацагдаад байна. Мөн төрсөн дүүгээ “Эрдэнэс Тавантолгой” компанийн ТУЗ-д багтаасан нь нүүрсний хулгайтай холбоотой гэж хардаж байна. Иймд АТГ-т хандлаа. Миний бие улс төрийн шинж чанартай зорилго агуулаагүй хэд хоногийн хугацаанд гадуур цахим сүлжээ, хэвлэл мэдээллийн сайтуудад нийтлэгдсэн мэдээллүүдийг шүүж, нягталж шаардлагатай баримтуудыг хүргүүлж байна. Энэхүү албан шаардлагаа АТГ-ын дарга, тэргүүн комиссар З.Дашдаваад хаяглаж байна” гэлээ.

+ There are no comments

Add yours