Египетийн Каир хотод буудлага спортын насанд хүрэгчдийн 53 дахь удаагийн Дэлхийн Аварга Шалгаруулах Тэмцээн(ДАШТ) энэ өдрүүдэд болж байна.
Өчигдөр тэмцээний эмэгтэйчүүдийн стандарт гар бууны 25 метрийн дасгалд Монголын гурван тамирчин медалийн тавцанд гарсан бөгөөд Ц.Мөнхзул алтан медаль хүртэж, төрийн дууллаа эгшиглүүлэв.
Түүнтэй мөр зэрэгцэн цэц сорьсон Т.Баярцэцэг мөнгө, Э.Хишигдэлгэр хүрэл медаль хүртлээ. Буудлага спортын ДАШТ-ий түүхэнд монгол тамирчид алт, мөнгө, хүрэл медалийг нэг дор хүртсэн удаагүй. Энэ бол түүхэн амжилт хэмээн Биеийн тамир, спортын улсын хорооноос мэдээллээ. Ц.Мөнхзулын хувьд уржигдар холимог багийн төрөлд мөнгөн медаль хүртсэн билээ.
Эх сурвалж: Биеийн тамир, спортын улсын хороо
