Япон улс Украины асуудлаар ОХУ-д шахалт үзүүлэх олон улсын хөдөлгөөнд нэгдэхийг Монгол улсад уриалжээ

Монгол Улсын Ерөнхий сайд Л.Оюун-Эрдэнэ Монгол-Японы хооронд дипломат харилцаа тогтоосны 50 жилийн ойг тохиолдуулан Гадаад харилцааны сайд Б.Батцэцэгийн урилгаар манай улсад айлчилж байгаа Япон Улсын Гадаад хэргийн сайд Хаяаши Ёшимасаг хүлээн авч уулзлаа.

Улаанбаатарт хүрэлцэн ирээд буй Япон улсын гадаад хэргийн сайд Ёшимаса Хаяаши өчигдөр Монгол улсын гадаад хэргийн сайд Батмөнхийн Батцэцэгтэй уулзахдаа Украинд эзлэн түрэмгийлэх дайн өдөөсөн ОХУ-ын эсрэг олон улсын хөдөлгөөнд нэгдэхийг шууд бусаар уриалсан тухай Киодо агентлаг мэдээлжээ.

Ням гарагт болсон уулзалтын үеэр Хаяаши сайд Москвагийн Украинд явуулж буй эзлэн түрэмгийлэл нь олон улсын хууль дүрэм, дэг журмыг зөрчиж байгаа тул дэлхий нийтээр нэгдмэл байр суурьтай байх шаардлагатайг Батцэцэг сайдад илэрхийлсэн тухай Япон улсын гадаад хэргийн яамны эх сурвалж мэдээлсэн байна.

Батцэцэг сайд Монгол улсын байр суурийг тайлбарлаж, олон улсын зүгээс ОХУ-д дарамт шахалт үзүүлэх хөдөлгөөнд Монгол улс нэгдэх боломжгүйг тайлбарласан тухай эх сурвалж мэдээлсэн байна.

Уулзалтын үеэр Монгол улсын гадаад хэргийн сайд Украинд нэн даруй гал зогсоож, хурцадмал байдлыг намжаах нь чухал болохыг онцолсон тухай Японы албаны эх сурвалж мэдээлсэн ч Хаяаши сайдын хүсэлтэд яг ямар хариу өгснийг дурдаагүй байна.

Япон улсын гадаад хэргийн сайд Ёшимаса Хаяаши өнөөдөр буюу Даваа гарагт Монгол улсын ерөнхийлөгч Ухнаагийн Хүрэлсүхэд бараалхсаны дараа айлчлал нь өндөрлөх юм байна.

Эх сурвалж: Kyodo News

+ There are no comments

Add yours