Чингэлэг тээвэрлэдэг автомат удирдлагатай тавцанг хэрэглээнд нэвтрүүлнэ

Монгол Улсын гаалийн байгууллагаас Удирдах ажилтны ерөнхий зөвлөгөөнийг жил бүр зохион байгуулдаг. Уг зөвлөгөөнөөр өнгөрсөн оны ололт амжилт, хүрсэн үр дүн, алдаа дутагдлаа хэлэлцэн дүгнэж, ирэх онд хийж хэрэгжүүлэх ажлаа төлөвлөдөг.

Гаалийн байгууллага 2021 онд улсын төсөвт 3.509 их наяд төгрөгийн орлого төвлөрүүлж, 98.6 хувийн биелэлттэй ажиллажээ.

Мөн бүс нутгийн хэмжээнд хүлээсэн үүргийн дагуу эрсдэлийн судалгаанд суурилан худалдааны луйвар, гаалийн зөрчлийг илрүүлэн таслан зогсоож нийт 933 хууль бус үйлдлийг хянан шийдвэрлэж 1.6 тэрбум төгрөгийн торгууль, 2.7 тэрбум төгрөгийн татварыг нөхөн төлүүлжээ.

ГЕГ-ын дэд дарга Б.Батхишиг:

-2022 онд боомтын шинэчлэлийг үргэлжлүүлэх болно. Тээвэрлэлтийн шинэ арга хэлбэрийг ашиглана. 2021 оны долоодугаар сард Засгийн газрын тогтоол гарснаар хамгийн анхны чингэлэг терминалын бүтээн байгуулалтыг эхэлж аравдугаар сард туршилтыг хийсэн.

Энэ онд Шивээ хүрэн боомт чингэлэг тээврийн терминалтай болсноор жилд 7.6 сая тонн нүүрс тээвэрлэх хүчин чадалтай болох юм. Жолоочгүй тээвэр хийдэг терминал, дүүжин тээвэр, төмөр замуудын бүтээн байгуулалтыг хийж чадвал боомтын хүчин чадлыг нэмэгдүүлж, цар тахлын нөлөөнд автахгүй.

Энэ жил 35 сая тонн нүүрс экспортлохыг төлөвлөж байсан ч 15.5 сая тонныг экспорт хийсэн. Гаалийн байгууллага хөрш орнуудын гаалийн байгууллагатай сайн харилцаатай ажилладаг.

Хилийн боомтуудад чингэлэг тээврийн терминал байгуулах эрхзүйн үндэс бүрдсэн. Энэ нь төр, хувийн хэвшлийн хамтын ажиллагааны хүрээнд бий болох боломжтой. Хүн хоорондын хавьтал үүсгэхгүйгээр, автомат системтэй байх юм.

Хоёр улсын хилийн хооронд чингэлэг тээвэрлэдэг автомат удирдлагатай тавцанг хэрэглээнд нэвтрүүлэхээр төлөвлөж байна. Үүнийг олон улсад хэрэглэж эхэлсэн. Мөн агаарын дүүжин тээврийг дэлхийн улс орнууд хэрэглэдэг.