Өмнөд Солонгосын ерөнхийлөгчийн жилийн цалин 240 сая вон байхаар тогтжээ

Өмнөд Солонгосын Боловсон хүчин, удирдлагын яамнаас төрийн албан хаагчдын цалинг нэмэгдүүлэх төлөвлөгөөг баталснаар Ерөнхийлөгчийн цалин 2022 онд 240 сая вонн (202,815$) байхаар тогтжээ.

Төлөвлөгөөний дагуу ирэх онд төрийн албан хаагчдын цалин 1.4 хувиар нэмэгдүүлэх аж. Энэхүү нэмэгдсэн цалингийн тогтолцоо нь 2022 оны тавдугаар сард бүрэн эрхийн хугацаа нь дуусах одоогийн ерөнхийлөгч Мүн Жэ Ин болон гуравдугаар сард шинээр сонгогдох ерөнхийлөгчид хамаарах юм.

Хуулиараа төрийн өндөр албан тушаалтнуудын цалин нэмэгдсэн ч Ерөнхийлөгч, Ерөнхий сайд нар цар тахлын улмаас иргэдийн амьжиргааны нөхцөл байдал хүндэрсэн тул иргэдийнхээ ачааг хуваалцах зарчмаар цалингийн нэмэгдлийг авахгүй буюу 2021 онтойгоо адил хэмжээний цалин авна хэмээн Засгийн газраас мэдээлжээ.
Засгийн Газраас төрийн албан хаагчдын цалинг 2017 онд 3.5 хувиар, 2018 онд 2.6 хувиар, 2019 онд 1.8 хувь, 2020 онд 2.8 хувь, 2021 онд 0.9 хувиар нэмэгдүүлжээ.