Орон сууцны үнэ өсжээ

Орон сууцны үнэ өсөж, хөрөнгийн захын идэвхжил нэмэгдэж байгааг Санхүүгийн тогтвортой байдлын тайланд дурдсан байна.

Хэдий тийм боловч орон сууцны үнийн сэргэлт ажиглагдаж байгаа ч үнийн хөөсрөлт үүсээгүйг тайланд онцолжээ. Орон сууцны үнэ нэмэгдэхэд хэд хэдэн хүчин зүйлс нөлөөлсөн байна. Тухайлбал: эрэлт, нийлүүлэлтийн хүчин зүйлс, барилгын материалын үнийн өсөлт зэргээс шалтгаалжээ.

Цар тахлын нөхцөл байдлаас шалтгаалан гадаадаас эх орондоо буцаж ирэх хөдөлгөөн нэмэгдсэн бөгөөд энэ нь орон сууцны эрэлтийг нэмэгдүүлсэн гол хүчин зүйл болсон байна.

“Тэнхлэг зууч”-ийн тооцооллоор орон сууцны үнийн индекс энэ оны II улиралд 1.9 хувь болж, өмнөх улирлаас бага зэрэг буурсан үзүүлэлттэй байна.

Харин Үндэсний статистикийн хорооны тооцооллоор тус индекс харьцангуй алгуур өсөлт үзүүлж, өмнөх улирлаас 0.4 хувиар нэмэгджээ. Мөн түрээсийн үнийн индекс тайлант хугацаанд өмнөх оны мөн үеэс 5.6 хувиар өссөн байна.

Түүнчлэн орон сууц худалдан авах эрэлт өндөр хэвээр байгааг Санхүүгийн тогтвортой байдлын тайланд дурджээ.