Умард ба Өмнөд Солонгос улсууд хэдхэн цагийн зайтай баллистик пуужингууд туршжээ

Умард ба Өмнөд Солонгос улсууд хоорондоо хэдхэн цагийн зайтай баллистик пуужингууд туршсан нь Солонгосын хойгт зэвсэглэлээр хөөцөлдөх явдал эрчимжсэнийг харууллаа.

Эхлээд Умард Солонгосын тал зүүн эргийнхээ усанд хоёр ширхэг баллистик пуужин харваж туршсан нь НҮБ-ын хоригийг илт зөрчсөн хэрэг байв.
Өчигдөр Хятадын гадаад хэргийн сайд Ван И Өмнөд Солонгост айлчилж, Умард Солонгосын цөмийн зэвсгийн асуудлаар яриа хэлэлцээ хийсэн юм.
Умардын туршилтаас хэдхэн цагийн дараа Өмнөд Солонгосын тал анх удаа шумбагч хөлөг онгоцноос баллистик пуужин харваж туршжээ.
Өмнөдийн тал энэ туршилтаа урьдаас төлөвлөгдсөн бөгөөд Умардын туршилтын хариуд авсан арга хэмжээ биш гэж мэдэгдсэн байна.
Туршилт амжилттай болсноор Өмнөд Солонгос нь шумбагч хөлөг онгоцноос харвах боломжтой баллистик пуужин бүхий дэлхийн долоо дахь улс болжээ.
Туршилтыг ажигласан Өмнөд Солонгосын ерөнхийлөгч Мүүн Жэ Ин улс орон нь “ямар ч үед Умард Солонгосын зүгээс гарч болзошгүй өдөөн хатгалагт хариу цохилт өгөх чадвартай боллоо” хэмээн мэдэгдсэн байна.
Мүүн Жэ Иний мэдэгдлийг Умард Солонгосын удирдагч Ким Жон Уны эмэгтэй дүү Ким Ёо Жон хүчтэй шүүмжилж, харамсал илэрхийлжээ. Тэрбээр Мүүн Жэ Инийг “хоёр улсын харилцааг ноцтой муутгах эрсдэлтэй мэдэгдэл хийлээ” хэмээн хатуу анхааруулсан байна.
Умард Солонгосын туршсан ойрын тусгалын пуужингууд 60 км өндөрт хүрч, 800 км зайнд туссан тухай Өмнөд Солонгосын зэвсэгт хүчин мэдээлжээ.
Пуужингуудыг Умард Солонгосын эх газрын төв хэсгээс Зүүн тэнгисийн (бас Япон тэнгис гэдэг) зүгт харвасан байна.
Яг ямар төрлийн пуужин туршсаныг тогтоох судалгаа, шинжилгээг эхлүүлснээ Өмнөд Солонгос, АНУ-ын зэвсэгт хүчнүүд мэдэгджээ.
Сүүлд Япон улсын батлан хамгаалахын сайд Умард Солонгосын пуужингууд тус улсын хяналтын усан бүсэд туссан тухай мэдээлсэн юм.
Умард Солонгосын дэглэм цөмийн зэвсэг бүтээх хөтөлбөр хэрэгжүүлж, олон удаагийн туршилт зохион байгуулсныхаа төлөө НҮБ-аас эдийн засгийн хоригоор шийтгүүлээд байгаа.
АНУ-ын засаг захиргаа цөмийн зэвсгийн хөтөлбөрөөсөө татгалзвал эдийн засгийн хоригийг цуцлах санал тавьж байгаа ч Пёньяны эрх баригчид эсэргүүцсээр байгаа юм.
Баллистик пуужингуудыг тусгалын зайгаар нь ангилдаг бөгөөд хамгийн хол тусгалтайг нь тив алгасах баллистик пуужин (Intercontinental Ballistic Missile-ICBM) хэмээн нэрлэдэг.
Умард Солонгос өмнө нь Баруун Европт бүрэн хүрэх, АНУ-ын эх газрын талд нь хүрэх тусгалтай тив алгасах пуужин туршиж байв.
 
Эх сурвалж: BBC