“Гар дээр 20.0 мянган төгрөгтэй үлдэж байгаа бид энэ цар тахлыг яаж давах юм бэ, дарга нар аа”

Дэлхийн эмч нарын баярын өдрийг тохиолдуулан Монголын эрүүл мэндийн ажилтны үйлдвэрчний эвлэлийн холбооноос “Цар тахал ба цалин хөлс” сэдвээр хэвлэлийн хурал хийж байна.

МЭАҮЭХ-ын Х.Ариунаа: Цар тахлын үед манай салбар маш их ачаалалтай ажиллаж байгаа. Төр засгийн шийдвэрийг тууштай дагаж бүтэн жил гурван сарын хугацаанд амралт, баяр ёслолгүй, 24 цаг тасралтгүй ар гэр амьдрал ахуйгаа орхин ажиллаж ирсэн. Салбарынхаа олон мянган ажилтны дуу хоолойг хүргэе гэж өнөөдөр баярынхаа өдөр хэвлэлийн хурал зарласан юм аа. Их эмчийн дундаж цалин 750.0-850.0 мянга, сувилагчийн цалин гэхэд 670.0-720.0 мянга, үйлчилгээний ажилчид 460.0-550.0 мянгын энэ цалингаас нийгмийн даатгалын шимтгэл мөн суутгагдана. Эмч, ажилчдын 90-ээд хувь нь 18.8-21.6 хувийн хүүтэй цалингийн зээлтэй. Урьдчилгаа цалин нь 220.0-280.0 мянган төгрөг буюу бидний цалин 100 ам.доллар ч хүрдэггүй. Энэ мөнгөө банкны зээлдээ өгөөд, гар дээр 20-30.0 мянган төгрөгтэй үлдэж байна. Бид энэ цар тахлын үед яаж амьдрах вэ. Энэ зөвхөн эрүүл мэндийн салбарын асуудал биш, Монголын гурван сая хоёр зуун мянган хүний эрүүл мэнд, амь насны асуудал яригдаж байна. Хэлий бидний цалин хөлс нэмэгдэж байгаа, илүү цагийн хөлс бодогдож байгаа гэж байгаа ч амьдрал дээр тийм биш.

Засгийн газарт дараах шаардлагыг хүргүүллээ. “Эрүүл мэндийн ажилтнуудын цалинг хоёр дахин нэмэгдүүлэх ; Зарим эмч ажилтнуудад олгогдоогүй байгаа илүү цагийн хөлсийг олгох зэрэг асуудлыг нэн даруй шийдвэрлэж өгөхийг хүсэж байна” гэв.