АТГ-аас “Эрдэнэт” үйлдвэрийн албан тушаалтнуудыг саатуулжээ

Эрдэнэт үйлдвэр ТӨҮГ-ын Худалдан авалт, хангамжийн хэлтсийн орлогч дарга Ж.Ганзориг, менежер Н.Марал-Эрдэнэ нарыг гуравдугаар сарын 24-25-нд шилжих шөнө саатуулсан байна.

Тэднийг Эрүүгийн хуулийн 22.1.2- т зааснаар хэрэг үүсгэн саатуулсан тухай ойрын эх сурвалж өгүүллээ. Эрүүгийн хуулийн 22.1.2- т “Нийгмийн албан тушаалтан эрх мэдлээ урвуулж их хэмжээний хохирол учруулсан” гэж заасан байдаг юм байна.

Ж.Ганзориг, менежер Н.Марал-Эрдэнэ нарыг саатуулсан шалтгаан нь “Төрийн болон орон нутгийн хөрөнгөөр бараа ажил, үйлчилгээ худалдан авах тухай” хууль зөрчиж эрх мэдлээ ашиглан бусдад давуу байдал олгон урьдчилан үгсэн тохиролцож хууль бус сонгон шалгаруулалт явуулдаг байсан хэмээн буруутгагдан баривчлагдсан бололтой.

Дашрамд дурдахад, сүүлийн үед Хангамжийн хэлтсийн орлогч дарга Ж.Ганзоригийн хөрөнгө огцом өссөн гэнэ. Тиймээс энэ байдал нь АТГ-ын анхааралд орж, шалгагдах үндэслэл болсон байх гэдэг хардлага бас байгаа юм. Учир нь түүний жилийн орлого 154 сая 847 мянга 600 төгрөг бол гэр бүлийнх нь орлого 495 сая 911 сая 860 төгрөг. Мөн 438 сая төгрөгийн үл хөдлөх хөрөнгөтэй, 248 сая төгрөгийн автомашинтай, 80 сая төгрөгийн үнэт эдлэлтэй, 418 сая 418 мянган төгрөгийн хадгаламжтай нь АТГ-т гаргаж өгсөн ХОМ-тээ дурджээ.