Энхсаран сувиллаас иргэдийг ХӨСҮТ-д тусгаарлаж эхэллээ

Шуурхай хурлаар Эрүүл мэндийн сайд дараах асуудлыг шийдвэрлэв. Үүнд :

-Энхсаран сувилалд ажиглалтад байсан хүмүүсийг ХӨСҮТ-д тусгаарлахаар боллоо. ХӨСҮТ-д орны бэлэн байдлыг бүрэн хангаж, өнөө шөнөдөө ХӨСҮТ-ийн тусгаарлалтад байршиж дуусах юм. Бүх орны нөөц, бэлтгэл ажлыг хангасан байна.

-Халдварын голомтод ажиллаж буй бүх эмнэлгийн ажилчид 5 сая төгрөгийн урамшуулал авсан. Харин лаборант, жолооч, вируслогийн ажилчид нэмэлт урамшуулалд хамрагддаггүй байсныг нөхөн олгохоор болов.

-Нэг удаагийн эмнэлгийн хэрэгслээр бүрэн хангах нөөц байгаа учраас ХӨСҮТ-ийн хэрэгцээт бүх хэрэгслээр хангах

-Илүү цагаар болон тусгай нислэг тосч шөнө, өдөргүй ачаалалтай ажилласан удирдах ажилтнуудын илүү цагийг олгох

-Коронавирусний халдварын үед ажиллаж буй ХӨСҮТ-ийн бүх авто машины засвар үйлчилгээ, даатгал зэрэг зардлыг ЭМЯ-наас шийдэх

-ХӨСҮТ-ийн мэс заслын тасгийн тоног төхөөрөмжийг сайжруулах, нэн шаардлагатай аппаратуудыг шийдвэрлэж өгөх

-Эмзүйн албаны агуулах байрны асуудлыг шийдвэрлэх

-Голомтод ажиллаж буй эмч, ажилчдын амрах байр, хэсгийг илүү тав тухтай, тохилог орчноор бүрдүүлэх төсвийг шийдэх

-Коронавирусний халдвар авсан эмч, сувилагчийн ар гэрт сэтгэл санааны дэмжлэг үзүүлэх

-ХӨСҮТ-д хоёр лифтийг шинэчлэх зэрэг асуудлыг нэн даруй шийдвэрлэхээр боллоо.

Ташрамд дурдахад, сүүлийн өдрүүдэд коронавируст халдварын шинэ тохиолдлууд Энхсаран сувиллаас илэрсэн тул болзошгүй эрсдэлээс урьдчилан сэргийлж тус сувилалд тусгаарлагдаж байгаа иргэдийг өнөө шөнөдөө ХӨСҮТ-д шилжүүлнэ гэдгийг ЭМЯ-ны хэвлэл мэдээллийн албаныхан тодотгосон юм.