Эрдэнэт үйлдвэр Баян-Өндөр уулын энгэрт 500 мод тарихаар болжээ

Эрдэнэт үйлдвэрийнхэн энэ хаврын “Бүх нийтийн мод тарих өдөр”-өөр Баян-Өндөр уулын энгэрт 500 ширхэг мод шинээр тарина. Нийгмийн хариуцлагын хүрээнд тус үйлдвэрийн Байгаль орчин, ногоон хөгжлийн хэлтсээс  өнгөрсөн жил Баян-Өндөр ууланд дүйцүүлэн нөхөн сэргээх ажлыг эхлүүлж, нэг га талбайд 800 ширхэг мод тарьсан юм. Энэ хавар бүх нийтийн мод тарих өдрийн бэлтгэл болгож, өнгөрсөн жилийн тарьсан моддыг тойруулан хамгаалалтын хашаа барьж байна. Хамгаалалтын хашаа барих ажлыг Байгаль орчин, ногоон хөгжлийн хэлтсийн ажилтнууд, бусад цех нэгжүүдтэй хамтран гүйцэтгэжээ. “Ойр орчимд нь мал бэлчээрлэх, шинэ тарьсан мод, суулгацыг идэж сүйтгэх зэрэг эрсдэл гарч болзошгүй тул Хүрэн булгийн аманд тарьсан модоо хамгаалах хашаа барилаа. Ингэснээр хүн, мал, амьтнаас тарьсан модоо хамгаалах хамгийн найдвартай үр дүнтэй арга болно” гэж Орхон аймгийн Байгаль орчин, аялал жуулчлалын газрын мэргэжилтэн Л.Батсайхан ярив.