Оны эхний гурван сарын байдлаар 33 хүн түймэрт өртөж амиа алджээ

Он гарснаас хойш эхний гурван сарын байдлаар улсын хэмжээнд 772 удаагийн гал түймэр гарч, 4.2 тэрбум төгрөгийн хохирол учирч, 33 хүн нас барж, 372 толгой мал хорогдож, 456 гэр орон сууц шатжээ. Дээрх гал түймрийн аюулаас Онцгой байдлын байгууллагын алба хаагчид 395 хүний амь нас, төр, аж ахуйн нэгж, байгууллагын 14.6 тэрбум төгрөгийн өмч хөрөнгийг хамгаалсан байна. Гарсан гал түймрийг өнгөрсөн оны мөн үетэй харьцуулахад 35.7 хувиар буурч, учирсан хохирлын хэмжээ 27.3 хувиар өссөн байна. Өнгөрсөн онд гал түймрийн улмаас 54 хүн амь насаа алдаж байжээ.