Эрээнээс монгол иргэдээ авчрахаар дөрвөн автобус хөдөлжээ  

Шинэ төрлийн коронавирусын анхлан дэгдсэн голомт болох БНХАУ-ын Ухань хотод хөл хорионд ороод байсан 31 монгол иргэнийг энэ сарын 2-ны өдөр МИАТ-ийн тусгай үүргийн онгоцоор эх орондоо авчирсан нь олон хүний талархлыг хүлээгээд байгаа. Цаашид ч БНХАУ-д байгаа иргэдээ авчрах арга хэмжээг зохион байгуулах юм. Энэ тухай ГХЯ-ны Консулын газрын дарга Л.Мөнхтүшиг “Нэгдүгээр сарын 28-нд цагаан сарын дараа Хятадын хил нээгдсэн. Түүнээс хойш өнөөдөр өглөөний 08 цаг хүртэл Монголын 5200 иргэн Хятадтай хиллэдэг бүхий л боомтоор нэвтэрч орж ирээд байна. Яг одоо Хятадын Эрээн хотод манай улсын 150 иргэн Замын-Үүдийн боомтоор орж ирэх хүсэлтээ өгчихөөд байж байгаа. Эдгээр иргэдийг авчрах ажил ид явагдаж байна” гэсэн юм.Иргэдийг авчрах ажлыг Монгол Улсаас БНХАУ-ын Эрээн хотод суугаа Консулын газар болон Хил хамгаалах ерөнхий газар хамтран зохион байгуулж байна. БНХАУ-ын Эрээн хотоос монгол иргэдээ эх орондоо авчрахаар өнөөдөр өглөө эрт дөрвөн автобус хөдөлжээ. Улаанбаатарт хэдэн цагт ирэхийг нууцалж байгаа бөгөөд нийслэлд ирэнгүүт нь Халдварт өвчин судлалын үндэсний төвд тусгаарлаж, үзлэг шинжилгээ хийх юм байна.