35 хүүхэд, 51 том хүн угаартжээ

Өнгөрөгч амралтын өдрүүдэд түүхий нүүрсэнд тавих хяналт шалгалтыг нийслэлийн 38 хорооны нутаг дэвсгэрт нийслэлийн Онцгой байдлын газар, Мэргэжлийн хяналтын газар, Цагдаагийн удирдах газар, дүүрэг хороодын 865 алба хаагч хийж долоон тн түүхий нүүрс илрүүлж, шахмал түлшний хэрэглээ болон цаашид түүхий нүүрс хэрэглэхгүй байх талаар заавар зөвлөмжийг өгсөн байна.

Яаралтай түргэн тусламжийн төвд өмнөх долоо хоногт угаарын хийнд хөнгөн хэлбэрээр хордсон нийт 35 өрхийн 86 иргэн, үүнээс 35 хүүхэд 51 том хүн хандаж, эмнэлгийн тусламж үйлчилгээ зөвлөмж авсан. Эмнэлэгт нэмж хүн хэвтээгүй бөгөөд нэг хүн эмнэлэгт эмчлүүлж байгаа аж.

Гэр хорооллын өрхүүд шахмал түлшээ хэрэглэж сурч байгаа ч мэргэжлийн байгууллагаас өгсөн зөвлөмжийг мөрдөж галлахгүй эрсдэлд орох магадлал өндөр буй гэнэ. Шахмал түлшгийг хэрэглэж хонохдоо савтай ус тавьж хонуулах нь угаарын хийн ууршлыг бууруулдаг ач холбогдолтой аж.

Агаарын чанарын индекс өнгөрөгч оны мөн үетэй харьцуулбал, хүхэрлэг хий стандарт түвшинд, “РМ10” тоосонцор 2.3 дахин бага, “РМ5″ тоосонцор 2.2 дахин бага, азотын давхар исэл стандарт түвшинд байсан байна. НОБГ-ын гамшгаас урьдчилан сэргийлэх хэлтсийн дарга Г.Нэргүй “Нийслэлийн онцгой комисс 24 цагийн шуурхай штабаар ажиллаж байгаа. Гэр хорооллын нийт өрхөд гурван удаа хүрч ажиллаад байна” гэж өнөөдөр мэдээлэл хийхдээ өгүүлсэн юм.