ДЭМБ-ын Номхон далайн баруун бүсийн захирал доктор Такеши Касай НЭМҮТ-д зочиллоо

ДЭМБ-ын  Номхон далайн баруун бүсийн захирал доктор Такеши Касай өнөөдөр Нийгмийн эрүүл мэндийн үндэсний төвийн үйл ажиллагаатай танилцлаа.

Нийгмийн эрүүл мэндийн үндэсний төвийн Ерөнхий захирал Д.Нарантуяа Монгол Улсын төрөөс нийгмийн эрүүл мэндийн талаар баримтлах бодлого, хэрэгжилт, нийгмийн  эрүүл мэндийн тусламж үйлчилгээний талаар илтгэл тавив.

Энэ үеэр бүсийн захирал Такеши Касай “Монгол Улсад бүсийн захирал болсноосоо хойш анх удаа айлчилж байгаа бөгөөд танай Нийгмийн эрүүл мэндийн үндэсний төв нь маш чухал хамтрагч гэдгийг дурдмаар байна. Ер нь салгаж ойлгож болохгүй хоёр байгууллага гэж ойлгож болно. Сүүлийн хоёр хоног та бүхний хэрэгжүүлж байгаа олон санаачлага үйл ажиллагаатай танилцлаа.

Элэгний хорт хавдар танай иргэдийн хувьд нэлээд том аюул болж байгаа. НЭМҮТ болон ДЭМБ-ын хувьд сэтгэл зовних асуудал. Элэгний хорт хавдрын 90 хувь нь вирусын хавдраар үүсгэгддэг гэсэн статистик тоо байна. ДЭМБ-ын өмнөх бүсийн захирал нь солонгос хүн байсан. Тэр хүн надад олон удаа хэлж байсан. “Солонгос улс нь өмнө нь нийгэм эрүүл мэндийн үйлчилгээний систем нь тогтож бүрэлдээгүй байх үед гепатит С вирусын тархалт маш их байсан. Олон хүний амь насанд хүрсэн. Миний танил анд нөхөд, хамт сурч байсан найз нөхөд минь С вирусээс болж нас барж байсан удаатай” гэж хэлж байсан.

Одоо С вирусын эсрэг эм гарсан байна. Танай Засгийн газрын зүгээс ард иргэдээ оношилж, эмчилгээ үзүүлэх чин эрмэлзлэлийг нь маш их сайшааж байгаа. Энэ хамтын ажиллагаагаараа дамжуулаад гепатитын С вирусээс үүдэлтэй нас баралтын тоог багасгаж чадна гэдэгт итгэлтэй байна” гэв.

Мөн тэрээр нийгмийн эрүүл мэндийн төвийн Шуурхай удирдлагын нэгж, Полимиелитын лаборатор болон сайжруулсан зуухыг сонирхлоо.