Төрийн тусгай хамгаалалтын үеэр үймээн үүсгэсэн хүмүүст зөрчлийн хэрэг нээн шалгаж байна

Өчигдөр буюу энэ сарын 27-ны өдөр Сүхбаатарын талбай дээр “Улсаа аврах ард түмний хөдөлгөөн”, “Үнэн ба зөв нам”, “Эрх чөлөөг хэрэгжүүлэгч нам”, “Хувиараа тээвэр эрхлэгчдийн нэгдсэн холбоо”, “Намгүй монгол хөдөлгөөн”, “Экологи зайсан ТББ” нар хамтран “Машинтай жагсаал”-ыг зохион байгуулсан. Энэ үеэр улсын тусгай хамгаалалт Төрийн ордон орчимд гарсан байв. Учир нь Тогтвортой хөгжлийн зорилгын хэрэгжилтийн асуудлаарх Олон улсын парламентын холбооны Ази, Номхон далайн бүсийн хоёрдугаар чуулганд оролцож буй зочид, төлөөлөгчид манай улсад ирсэн байсан билээ. Харин олон улсын зочид төлөөлөгчид манай улсын төрийн тэргүүнд жуух бичиг гардуулах ёслол болохын өмнөхөн дээрх төрийн бус байгууллагын хүмүүс Төв талбай дээр жагсаал зохион байгуулах үеэрээ машинаараа урсгал сөрж улмаар тусгай хамгаалалттай бүс рүү нэвтрэхийг завдаж үймээн үүсгэсэн байна.