Сэтгэцэд нөлөөлдөг эмийг “архинаас гаргадаг” гэж цахим орчинд зарж байжээ

Сэтгэцэд нөлөөлдөг байж болзошгүй эмийг фэйсбүүк орчинд их хэмжээгээр зарж, борлуулж байсныг хураан авч шалгалтын ажиллагаа явуулж байна.

Тодруулбал, Монгол улсын хилээр хэзээ, хаана, аль улсад үйлдвэрлэсэн нь тодорхойгүй “DIZONE” гэх нэртэй эмийг их хэмжээгээр хууль бусаар нэвтрүүлж, интернет орчинд худалдан борлуулж байсан хоёр этгээдийг Эрүүгийн цагдаагийн албанаас илрүүлжээ.

Тэд “DIZONE” гэх эмийг “Архинаас эрчимтэй, үр дүнтэй гаргана” хэмээн иргэдэд сурталчилан нэг ширхэг тус бүрийг нь 300 мянган төгрөгийн өртөгтэйгөөр зарж байжээ. Дээрх эм нь Монгол Улсад эмийн бүртгэлгүй, Мэргэжлийн хяналтын шалгалтаар ороогүй, эрүүл мэндийн зөвшөөрөлгүй байсан нь шалгалтаар тогтоогдоод байна. Одоогоор архинаас гаргах үйлчилгээтэй гэх дээрх эмийг хэдэн хүн авч хэрэглэснийг нь тогтоохоор ажиллаж байгаа аж. Энэхүү эм нь урьдчилсан байдлаар хүний сэтгэцэд нөлөөлөх үйлчилгээтэй нь батлагдаад буй бөгөөд их хэмжээгээр хадгалж зарын сайтуудаар түгээж зарж байжээ.

Сэтгэцэд өөрчлөлт оруулдаг байж болзошгүй архинаас гаргах үйлчилгээтэй эмийг элэг цэвэрлэнэ хэмээн иргэдийг хууран мэхэлж борлуулж байсан аж. Иймд ЦЕГ-ын Эрүүгийн цагдаагийн албанаас дээрх хууль бус эмийг зарж борлуулж байсан этгээдүүдийг шалгаж, иргэдийг хохиролгүй болгохоор хэрэг бүртгэл нээн шалгаж байгаа юм байна.

СЭРЭМЖЛҮҮЛЭГ: Иргэд та бүхэн аливаа эмийн бэлдмэл, витамин, тураах эм болон гоо сайхны бүтээгдэхүүнийг цахим орчноос худалдан авахгүй байхыг анхааруулж байна. Мөн худалдан авах гэж буй бүтээгдэхүүнийхээ гарал үүслийн бичиг, Монгол улсад худалдан борлуулах зөвшөөрөл авсан эсэх, эмчийн бичиг магадалгаа байгаа эсэх, зохих шинжилгээний бичиг байгаа эсэх, албан ёсоор оруулж ирсэн эсэхийг нягталж байж худалдан авахыг зөвлөж байна. Сүүлийн жилүүдэд цахим худалдаа идэвхтэй болохын хирээр иргэдийн хууль бус эмийн хэрэглээ задгайрч, хуурамч бүтээгдэхүүн худалдан авч эрүүл мэнд, гоо сайхнаараа хохирсоор байна. Түүнчлэн интернет орчинд маш олон төрлийн залил ангийн төрлийн гэмт хэргүүд бүртгэгдэж байгаа учраас анхаарал болгоомжтой байхыг цагдаагийн байгууллагаас анхааруулж байна.