Дахин таван гишүүний бүрэн эрхийг түдгэлзүүлэх асуудлыг УИХ-д оруулж ирэх үү

ЖДҮХС-аас өөрийн хамаарал бүхий этгээд, аж, ахуй нэгж, компанид зээл авсан УИХ-ын гишүүн Б.Батзориг, Б.Ундармаа, Л.Энхболд, Г.Солтан, Д.Дамба-Очир нарыг АТГ-аас яллагдагчаар татсан байна.

Улсын ерөнхий прокуророос дээрх таван гишүүний бүрэн эрхийг түдгэлзүүлэх хүсэлтийг УИХ-д хүргүүлсэн ч хүлээж аваагүй. Прокуророос тэднийг хэргийн мөрдөн байцаалтад саад учруулж буй талаар мэдээлж байсан. Мөн ЖДҮХС-аас зээл авсан гишүүдийн компанийг шүүхэд дуудсан гэх мэдээлэл байгаа юм.

Хаврын чуулганаар дахин таван гишүүнийг түдгэлзүүлэх хүсэлтийг ерөнхий прокуророос УИХ-д хүргүүлж хэлэлцүүлэхээр бэлтгэж байгаа гэх мэдээллийг УИХ-ын гишүүн О.Баасанхүү өнөөдөр өглөө.

Тэрбээр энэ талаар “Яллагдагчаар татагдсан таван гишүүний асуудал шүүх рүү шилжсэн. Өөр таван гишүүний асуудал орж ирнэ. ЖДҮХС-аас зээл авсан нийт 23 гишүүний асуудал бий. Тав, таваар нь асуудлыг нь ярина. Нэг эмэгтэй гишүүн бэлэглэлийн гэрээгээр 120 сая төгрөг авсан. Надад 120 сая төгрөг бэлэглэсэн гээд гарын үсэг зурчих гээд. Мөн нэг эрэгтэй гишүүн АТГ-ын мөрдөн байцаагчийг ална, тална гэж сүрдүүлсэн гээд шившгийн хүмүүсийн асуудал орж ирнэ” гэлээ.