Ц.Даваасүрэн: Оюутолгой Монгол Улсын эрчим хүчний нэгдсэн системтэй холбогдоно

Ц.Даваасүрэн: Оюутолгой Монгол Улсын эрчим хүчний нэгдсэн системтэй холбогдоно
Засгийн газрын ээлжит хуралдаан өнөөдөр болж, 22 асуудал хэлэлцлээ. Улмаар хуралдаанаас Оюутолгойн бүтээн байгуулалтад ашиглах эрчим хүчийг дотоодоос 100 хувь хангах цахилгаан барих гэрээг дэмжсэн байна. Энэ талаар Эрчим хүчний сайд Ц.Даваасүрэн мэдээлэл хийлээ. Тэрбээр “Оюутолгойн бүтээн байгуулалтыг эрчим хүчээр хангах цахилгаан станц 2023 оны зургаадугаар сард ашиглалтад орох ёстой. Үүнээс өмнө ирэх оноос Оюутолгойн ашиглах эрчим хүчний тодорхой хэсгийг дотоодоос хангана. Өөрөөр хэлбэл, Оюутолгойн гэрээний өөрийнх нь хүлээсэн үүргийн дагуу Монгол Улсын дотоодоос эрчим хүчний тодорхой хэсгийг хангана гэсэн үг. Энэ бол түүхэн шийдвэр. Дотоодын эх үүсвэрийнхээ дэд бүтцийг барьж байгуулах ажлыг үндсэндээ дуусгаж байна. Он гараад Оюутолгой Монгол Улсын эрчим хүчний нэгдсэн системтэй холбогдоно” гэлээ.

Ингээд сэтгүүлчдийн сонирхсон асуултад хариулсан юм. 

-Оюутолгойн цахилгаан станц баригдах ажил дээр төрийн зүгээс шалтгаалсан ажлууд ерөнхийдөө жигдэрсэн гэж ойлгож болох уу?

-Засгийн газрын өнөөдрийн хуралдаанаар ерөнхий гэрээ нь дэмжигдлээ. Одоо шат дараатай ажлууд үргэлжилнэ. Тодорхой хэлцлүүд хийгдэж, байгаль орчин, усны үнэлгээ хийгдэнэ. Хөрөнгө оруулагчдын дунд бас гэрээ байгуулагдана. Ингэж явсаар 2020 онд цахилгаан станц баригдаж эхлэх юм. Хугацаанууд гэрээнд тодорхой тусч өгсөн байгаа. Одоо цаашдаа гацалт үүсэхгүй, гэрээний хүрээнд ажил явагдана.

Ирэх жилээс Оюутолгойд манай улс яг хэдий хэмжээний эрчим хүч нийлүүлж эхлэх вэ?

-Бид байгаа боломжоосоо эхлүүлнэ. Эхний ээлжинд 20 мгВт эрчим хүч нийлүүлнэ. Ирэх жилээс хэд хэдэн шинэ эх үүсвэрүүд  нэмэгдүүлнэ. Энэ хүрээнд Оюутолгой руу эрчим хүч нийлүүлэлтээ нэмэгдүүлээд явна гэсэн үг.

-Манай улсын эрчим хүчнийхээ тодорхой хэсгийг Оюутолгой компанид ашиглуулснаар хэдий хэмжээний мөнгө олохоор тооцоолж байна вэ?

-Оюутолгойн компани БНХАУ-аас 100 гаруй мвт-ын цахилгаан эрчим хүчийг импортлон авч байгаа. Энэ нь 160-170 орчим сая доллар. Нийт авч байгаа эрчим хүч нь манай улсын хэрэглээний 20 хувьтай тэнцэнэ. Бид 2023 оноос дотоодоосоо 100 хувь Оюутолгойд эрчим хүчээ хангадаг болсноор 200 гаруй сая долларыг эх орондоо авч үлдэнэ. Станц баригдсанаар Рио Тинто хөрөнгө оруулалтын гэрээгээр хүлээсэн үүргээ биелүүлнэ.

Гэрээний дараа тодорхой хэлцлүүд хийгдэнэ. Засгийн газрын хуралдаанаар гэрээг дэмжсэн. Байгаль орчны тэр дундаа усны чиглэлийн үнэлгээнүүд хийгдэнэ. Хөрөнгө оруулагчдын хооронд гэрээ хийнэ. Цахилгаан станц эхлэх ажил нь 2020 оны гуравдугаар сар. Улмаар 2023 оны зургаадугаар сар гэхэд станцаа хүлээж авна. Үүнийг гэрээнд хатуу зааж өгсөн.

Leave a Reply

Your email address will not be published.