Утааны голомтод амьдардаг 9-12 насны хүүхдүүдийн 81 хувь нь маск зүүдэггүй

АШУҮИС-ийн НЭМС-ийн Хөдөлмөр, Орчны  эрүүл ахуйн лаборатори, Ногоон титэм байгаль орчны шинжилгээний лабораториос “Улаанбаатар хотод амьдардаг хүүхдүүд агаарын бохирдолд өртөх байдлыг тодорхойлох судалгаа”-г хийжээ. Судалгаанд Баянзүрх дүүргийн VI хороо, Чингэлтэй дүүргийн VI хорооны 9-12 насны сургуульд сурдаг, хичээлдээ явах, харихдаа явган алхдаг, сургууль болон гэр хоорондын зайн нь 2 км-ээс багагүй 100 хүүхдийг сонгосон байна.

Тус судалгаанд хамрагдсан хүүхдүүдийн 81 хувь нь маск хэрэглэдэггүй болохыг тогтоожээ. Мөн “Маск зүүх нь агаарын бохирдлоос хамгаална гэж боддог уу” гэсэн асуултад, судалгаанд хамрагдсан хүүхдүүдийн эцэг эхийн

• 65 хувь нь тийм
• 18 хувь нь үгүй
• 17 хувь нь мэдэхгүй гэсэн хариултыг өгчээ.

Маск агаарын бохирдлоос хамгаална гэж хариулсан эцэг эхчүүдийн зөвхөн 22 хувь нь хүүхдүүдээ маск хэрэглүүлдэг байна. Маск агаарын бохирдлоос хамгаалахгүй болон мэдэхгүй гэж хариулсан эцэг эхчүүдийн дийлэнх хувь (88 хувь, 82 хувь) нь хүүхдүүддээ маск хэрэглүүлдэггүй гэсэн судалгааны дүн гарчээ.