Мал аж ахуйн салбарын өвлийн бэлтгэл 89 хувьтай байна

Энэ онд малд өгөх өвс нэг сая тн, сүрэл 16.6 мянган тн, ногоон тэжээл 113.4 мянган тн, үйлдвэрийн тэжээл 42.3 мянган тн-ыг бэлтгээд байна. Энэ нь бэлтгэвэл зохих нийт өвс, тэжээлийн 89.5 хувийг эзэлж буй аж. Аймаг, нийслэл, сум, дүүргийн өвс, тэжээлийн аюулгүйн нөөцөд 25.9 мянган тн өвс, 14.7 мянган тн тэжээл бэлтгэх ёстой байсан.

Одоогийн байдлаар 21.2 мянган тн өвс, 7.1мянган тн тэжээл бэлтгэсэн нь аймгийн түвшинд 94.5 хувь, сумдын түвшинд 66.7 хувийн биелэлттэй байна. Мөн өнгөрсөн жил манай улс малд өгөх тэжээлийн ургамал импортоор авч байсан бол энэ жил хангалттай хэмжээгээр тэжээлийн ургамал бэлтгэсэн учраас импортоор авахгүй гэсэн тайлбарыг холбогдох албаныхан өгчээ.

Өвөл, хаврын бэлчээрийн даацын судалгаагаар нийт нутгийн 60 гаруй хувьд мал өвөлжилт, хаваржилт хэвийн байх аж. Харин нутгийн 40 орчим хувь нь бэлчээрийн хүрэлцээ муу гэсэн үзүүлэлттэй гарсан байна.