Увайгүй, улаадаггүй Улс төрчийн бодит төрх…

Монгол Улсын түүхэнд төрийн эрх барьж байсан олон засгийн газар огцорч байсан ч өнөөгийн засгийн газрын тэргүүн У.Хүрэлсүх шиг үймээн самууны байдал үүсгэсэн нөхцлийг бий болгож байсан нь үгүй юм. Тийм ч учраас энэ засгийн эрхийн төлөө ийм их зүтгэл гаргаж, иргэд олныхоо төлөө хийж гавьсан зүйлгүй атлаа, сэлэм эргүүлж давхисан эрхэмийн албан тушаалаа хамгаалан үлдэх гэсэн шоу байдалд иргэд туйлдаж байна.

Харин эрх мэдэл, цөөхөн хэдэн хүний эрх ашгийн төлөө сүлбэлдэн давхигч нөхдөөр хүрээлэгдэж, хэдхэн хүний үг, үйлдлийг “ард түмний хүсэл мөрөөдөл” мэтээр ойлгож, ойлгуулах гэсэн эрх мэдэлтнүүдийн тулаан өнөөдөр “мөргөлдөөн”-дөө хүртлээ догширч байгаа  нь харамсалтай. Нам түшсэн төрийн эрх баригчийн суудалтайгаа зууралдаж, адаг сүүлдээ 100 залуугаар өөрийгөө хамгаалуулж, жагсаал цуглааны байдлыг бий болгож, нийгмийг түгшээсэн үйлдэлд хэн хожиж, хэн хохирох вэ.

Мэдээж, хамгийн их хохирох хүмүүс бол жирийн иргэд, өөрсдийн боломжиндоо тулгуурлан бизнесээ хөгжүүлэн яваа жинхэнэ жижиг дунд үйлдвэрлэгчид юм. Гэтэл энэ хүмүүсийн, жинхэнэ ард түмний эрх ашгийг хаян өөрсдийн эрх барих эрх мэдлээ хамгаалан шунан дурлагчдад хариуцлага тооцох нь цагаа олсон үйл явдал хэмээн үзэгчид олон байгаа болохоос Улаан хамгаалагчиййн суудлыг хамгаалан тэмцэхэд үгсэн нэгдэх нь цөөн юм.

Нөгөө талаар У.Хүрэлсүхийн Засгийн газар шиг, алуурчинтай, архичинтай, авлигачинтай, иргэдээ хуурч, тэрбумаар нь хөнгөлөлттэй зээлд хамрагдаж, эргээд иргэдээ өндөр хүүтэй зээлээр дарамталдаг “идэж уухын донтой” гэмээр сайд нараар багаа бүрдүүлсэн Засгийн газар Монголын түүхэнд байгаагүй гэдгийг сануулаад ч хэрэггүй юм.

Тиймээс улс төрчдийн эрх ашгаас гадна энэ амьдралын эгэл жирийн дүрмээс гадуур амьдарч байгаа Сайд нэрээр нүүрээ халхалсан багийн арьсыг хуулж, байранд нь тавихыг харин ч иргэд маш ихээр хүсч байгаа болохоос таван төгрөгт хууртаж цагийн ажил мэтээр хөлслөгдөн ирж буй 100 залуугийн хамгаалалт бол иргэдийн төлөөлөл биш гэдгийг мартаж болохгүй юм…