АН-ын бүлэг УИХ-ын чуулганы хуралдаанд оролцохгүй гэж мэдэгдлээ

УИХ-ын чуулганы өнөөдрийн хуралдаан эхэллээ. Хуралдаанаар “Төрөөс мөнгөний бодлогын талаар 2019 онд баримтлах үндсэн чиглэл батлах тухай” УИХ-ын тогтоолын төслийн анхны хэлэлцүүлгийг хийж байна.

Хуралдааны эхэнд УИХ дахь АН-ын бүлгийн дарга Д.Эрдэнэбат мэдэгдэл хийлээ.

Тэрбээр “2018 оны аравдугаар сарын 26-ны өдөр УИХ-ын дарга болон Ерөнхий сайдад шаардлага хүргүүлсэн. Энэ шаардлагын дагуу тодорхой хариу арга хэмжээ авч хариу ирүүлэхгүй бол АН-ын бүлэг өнөөдрөөс эхлэн хуралдаанд оролцохгүй гэдгээ албан ёсоор мэдэгдсэн. Өнөөдөр арваннэгдүгээр сарын 1-ны өдөр. УИХ-ын даргын зүгээс хуралдааны дэгийг баримталж хуралдаанд оролцох нь зүйтэй гэдэг бичгийг АН-ын бүлэгт ирүүлсэн. Харин Засгийн газраас өнөөдрийг хүртэл бидэнд ямар нэгэн хариу ирүүлсэнгүй. Асуудал улам даамжрах шатандаа орж байна. Бид энэ асуудлаар байр, сууриа илэрхийлэх нь зүйтэй гэж үзэж байгаа. Бид дахин шаардлагыг тавьж байна. Нэгдүгээрт, УИХ-ын гишүүдийг зохион байгуулалттай авлигадсан У.Хүрэлсүхийн Засгийн газрыг огцруулахыг бид дахин шаардаж байна. Хоёрдугаарт, сонгогчдын итгэлийг алдаж, шударга ёс, үндэсний эрх ашгийг уландаа гишгэж өөрийн компанид зээл авсан УИХ-ын гишүүдэд хариуцлага тооцохыг шаардаж байна. Гуравдугаарт, энэ бүхнээс алдагдсан боломжийг иргэдэд буцаан олгох ажлыг УИХ, Засгийн газар яаралтай зохион байгуулах нь зүйтэй гэж үзэж байна. Монгол улсын 2019 оны төсөв нь Үндэсний эдийн засгийн аюулгүй байдал, аж ахуйн бүх хэвшил болон хүн амын нийгмийн хөгжлийг хангах гэсэн Үндсэн хуулийн 5.4 дүгээр заалтыг ноцтой зөрчиж байна. Төрийн өндөр албан тушаалтнууд шударга ёс, тэгш байдал, хууль дээдлэх төрийн үйл ажиллагааны үндсэн зарчмыг Үндсэн хуулийн 1.2 дугаар заалтыг ноцтой зөрчсөн байдлууд илэрч байна. Тиймээс энэхүү зөрчлийг арилгах хүртэл АН-ын бүлэг чуулганы хуралдааны Дэгийн тухай хуулийн 1.10-т зааснаар хуралдаанд хугацаагүйгээр оролцохгүй байхаа үүгээр мэдэгдэж байна. Зөрчлийг арилгасны дараа хуралдаанд оролцоно гэдгээ мэдэгдэж байна” гэлээ.

Өнөөдрийн хуралдаанд тус бүлэг лоозонтой оролцсон юм.