Дөнгөж сая Нийслэлийн прокурорын газрын олон нийттэй харилцах ажил хариуцсан хяналтын прокурор Г.Бясман С.Зориг агсны хамтран амьдрагч Б.Булганыг яллагдагчаар татсан асуудлаар мэдээлэл хийлээ.
Тэрбээр “УИХ-ын гишүүн, дэд бүтцийн сайдын үүрэг гүйцэтгэгч асан С.Зориг агсны амь насыг хохироосон эрүүгийн … дугаартай хэрэгт Тагнуулын Ерөнхий газрын мөрдөн шалгах хэлтсээс ЦЕГ-ын Мөрдөн байцаах хэлтэстэй хамтарсан ажлын хэсгээс шалгаж байгаа.
Уг хэргийг зохион байгуулсан, захиалсан үйлдлийг шалгах ажиллагааны явцад шинээр цугларсан нотлох баримтуудаар С.Зориг агсны хамтран амьдрагч Б.Булганыг өчигдөр буюу 2018 оны дөрөвдүгээр сарын 18-ны өдөр эрүүгийн хэрэг үүсгэж прокуророос яллагдагчаар татсан. Улмаар яллагдагчаар татсан тогтоолоо танилцуулж байцаалт авсан. Одоо мөрдөн шалгах ажиллагаа явагдаж байна” гэв. Мэдээллийн дараа сэтгүүлчдийн асуултад хариуллаа.
-Өчигдөр Б.Булган өмгөөлөгчтэйгээ хамт ТЕГ-аас гарч ирэхдээ нууцын материалд гарын үсэг зурж баталгаажуулсан гэх мэдээллийг өгсөн. Тэгэхээр худлаа мэдээлэл өгсөн гэсэн үг үү?
-Монгол Улсын төрийн болон албаны нууцын тухай хуулиар төрийн нууцын баталгааг нэг л удаа авдаг. Өмнө нь шалгагдсан хэрэгт Б.Булганаас нууцын баталгаа авсан байсан учраас өчигдөр дахин түүнээс нууцын баталгаа авах шаардлага байхгүй.
-Гадуур шалгах уу?
-Мөрдөн шалгах ажиллагаа явагдаж байгаа учраас илүү мэдээлэл өгөх боломжгүй.
+ There are no comments
Add yours