Нутагт нэгт, доод зиндааны бөхөө зодож танхайрсан хэрэг тарьсан сумогийн аварга Д.Бямбадоржийн хэргийг Японы цагдаагийн газраас өчигдөр буюу 12 дугаар сарын 11-нд прокурорт шилжүүлсэн байна. Тоттори мужийн цагдаа нар уг хэргийг мөрдөн шалгаж дууссан учир дараагийн шатны байгууллагад шилжүүлсэн нь энэ аж.
Аварга Харүмафүжи Д.Бямбадорж алсын удирдлага болон гараараа хүчтэй цохиж толгойг нь гэмтээсэн тул Таканоива А.Баасандорж арав хоногийн турш эмчилгээ хийлгэсэн гэнэ. Мөн толгойдоо томоохон оёдол тавиулсан зэргээс нь үүдэн цагдаа нар Харүмафүжиг залуу бөхөд ноцтой гэмтэл учруулсан гэж үзжээ. Харүмафүжи, Таканоива нар өнөөг хүртэл тохиролцоонд хүрч чадаагүй байна. Хийсэн хэргээсээ болж зодог тайлсан ч гэлээ Харүмафүжи хуулийн дагуу ял шийтгэгдэж магадгүй байдалд ороод байгаа аж.
