Хуульчдад хандаж илгээх захидал

Монголын хуульчид бид шударга ёсыг тогтоохын төлөө бусдыгаа манлайлан ажиллах учиртай. Харамсалтай нь ихэнх маань бодит үнэнийг гуйвуулж, нууж, улс төрийн намуудад талцан хуваагдаж ард түмний итгэл үнэмшлийг устгаж, гэм нүглийг өөгшүүлж байгаа нь үнэхээр харамсалтай.

Өнгөрсөн 1 сарын хугацаанд Монголын хуульчдын үнэн нүүр царайг илчилсэн олон үйл явдал болж ард түмэн нүдээ нээж зөв зүгтээ харах гэж байх шиг байна.

Тухайлбал:
1. Хууль зүйн сайд, УИХ-ын гишүүнээр 7 удаа сонгогдсон Ц.Нямдоржтой холбоотой асуудал. Тагнуулын албаны дарга нараас гадаад тагнуулын байгууллагад элссэн тухай мэдээлэл. Энэ ноцтой юу? Үүнтэй холбогдуулж Ц.Нямдоржийн ярианууд, үйлдлүүд. Хордуулсан, Зоригийн хэргийн талаарх байр суурь, 60 тэрбум, Эрдэнэтийн гэх хэргийн талаарх мэдээллүүд, Цагдаа, тагнуулын дарга нарын халаа сэлгээ
2. ТЕГ-ын дарга асан Б.Хурцын удаа дараагийн мэдэгдлүүд, УИХ-ын гишүүн Л.Болдтой холбогдох мэдээллүүд
3. УИХ-ын гишүүн Ж.Батзандангийн мэдээллүүд
4. Монгол улсын Ерөнхий сайд У.Хүрэлсүх, Ж.Мөнхбат нарын нүүрсний хулгайч, мөнгөөр томилогдсон төрийн албан хаагчдын мэдээлэл

Энэ бүхэн бүгд гэмт хэргийн шинжтэй мэдээллүүд. Монгол улсад Хууль хяналтын байгууллага байна уу? Тэд юу хийгээд байгаа юм бэ? Яагаад хараат бус байх ёстой хуульчид бусдын эрхшээлд орчихоод мэдэгдэл хийх төдий суугаад байгаа юм бэ?

Бодит байдал бол ард түмэн ядуурч, ажилгүйдэл, төрөл бүрийн гэмт хэрэг өсч байгаа таагүй амьдрал л байна. Харин төрийн эрх баригчид хагартлаа баяжиж, хэдэн арван тэрбумаар тоологдох хөрөнгөөрөө гайхуулж байна.

Хуульчдаа….
Энэ бүх асуудлын учрыг та бүхэн л тайлна. Эх орныхоо ирээдүйн төлөө мэргэжлийн ёс зүйтэй байж шударга үгээ хэлээч та бүхэн.

Хурц, Нямдорж гэдэг хувь хүмүүсийн асуудал гэхээсээ Хууль зүйн салбарын бодит байдал гэдгийг ухамсарлаж Шүүх засаглалын хараат бус, шударга шийдвэр гаргах чадамжийг нэмэгдүүлж, ард түмний итгэлийг сэргээх бодитой ажлууд хийцгээе. Өөрчилцгөөе….

Та нар минь амьд уу?

Ээлжлэн даргын ширээнд томилогдон нэг нэгэндээ баярын бялуу зөөж гүйхээ болиод нийгмийн өмнө хүлээсэн үүргээ ухамсарлаж хулгайч, луйварчин эрх баригчидтай эрс тэмцье!!!!

Шударга ёс, Шударга шүүхийн төлөө өөрийн сайн дураар 14 жил тэмцсэн билээ би.

Би өөр хоорондоо маргалдаж, тэмцэлддэггүй, хуйвалдаж, хуваагдаж нэгнээ мэхэлдэггүй нийгэмд амьдрахыг хүснэ.

Монгол улс мандан бадраг.

Хуульч, судлаач, Цагдаагийн бэлтгэл офицер Х.Бат-Ялалт