УВСЫН ИРГЭД ШУДАРГА БУС ЗАСАГ ДАРГАА ОГЦРУУЛАХААР ЖАГСАНА

Баруун аймгийн засаг ноёд ойрын өдрүүдэд тун ч барцадтай байгаа бололтой. Тодруулбал, өчигдөрхөн Баян-Өлгий аймгийн Засаг даргыг огцруулсан. Гэтэл маргааш Увс аймгийн хэсэг иргэд хууль бус томилогдсон Засаг дарга       Д.Батсайханыг огцрохыг шаардаж Октябрын баяраар жагсаал хийх гэнэ. Энэ талаараа маргааш хэвлэлийн бага хурал хийхээр зарласаныг Зууны мэдээ сонинд нийтлэгдсэн байна.

Увс аймгийн засаг дарга Д.Батсайхан нь Эрүүгийн хуулийн 263 дугаар зүйлээр яллагдаж, шүүхээс хоёр жил хоригдож, хоёр жил төрийн албанд ажиллах эрхээ хасуулж байсан нэгэн аж. Түүнийг ялтай хугацаа нь дуусаагүй байхад аймгийн удирдлагаар томилогдож ажилласан нь шударга бус үйлдэл хэмээн нутгийн иргэд нь үзэж буй гэнэ.

Монгол Улсын Ерөнхий сайд У.Хүрэлсүх ажлаа авсан даруйдаа “Сахилга хариуцлага, дэг журмыг чангатгах тухай” албан даалгавар гаргасан байдаг. Тус албан даалгаварт авлигын хяналтыг сайжруулж, төрийн бүх шатны алба хаагчид шударга ёс, хууль дээдлэх зарчим баримтлан ажиллахыг үүрэг болгосон. Мөн зөрчил дутагдал гаргасан албан тушаалтанд зохих ёсны дагуу үүрэг хариуцлага тооцохыг хатуу сануулж, ЗГХЭГ-ын дарга Г.Занданшатарт үүрэг болгосон. Тэгвэл энэ албан даалгаврыг сахиж, шударга бус шийдвэрээр өндөр албан тушаал хашиж байгаа аймгийн Засаг даргаа огцруулахаар Увс аймгийн иргэд ийнхүү нэгдэж байгаа юм байна.  Увс аймгийн иргэдээс гаргасан шаардлагыг Ерөнхий сайд У.Хүрэлсүх хэрхэн хүлээж, шийдвэрлэхийг харж л байх үлдлээ, монголчуудад…

С.Нямдорж