Хүүхдүүд хар тугалганд хордож байгаа нь танд хамаагүй юу Ц.Ууганбаяр захиралаа

Туул голын сав газар аккумулятор хайлуулж буй үйлдвэрийн үйл ажиллагаанаас болж гурван хүүхдийн цуснаас хар тугалга илэрсэн талаарх асуудлаар холбогдох байгууллагуудын удирдлагууд өнөөдөр хуралдлаа.

Тэд “Гамшгийн эсрэг үндэсний төв” болон “Хатан туул голоо хамгаалах үндэсний хөдөлгөөн”-ий зүгээс үйлдвэрлэл явуулж буй “Заламт гол” ХХК-ийг  нүүхийг шаардсан юм.

“Заламт гол” ХХК-ийн Захирал Ц.Ууганбаяр “Манай үйлдвэр баригдаагүй байхад зөвшөөрөлгүй хүмүүс аккумуляторын шингэнийг хөдөө хээр асгаад гадагш нь экспортолдог байсан. Бидний хэдэн залуучууд нийлээд хууль ёсных нь дагуу, стандартын үйлдвэр байгуулан татвараа төлөөд явж байна. Өнөөдөр манай компанийн араас гомдол гаргаад яваад байгаа хүмүүс бол шантаажчид. Хэрэв зөрчил байвал бид арилгана. Манай компани 77 удаа шалгагдаж байсан. Хулгайгаар ийм үйл ажиллагаа явуулдаг хятад компаниуд байдаг. Тэд нартай тэмцэхгүй байж бид нарыг ингэж дарамтлаад байна. Бид нар хог хаягдлаар л мөнгө хийж байна. Бид Монголынхоо баялгийг гадагш зөөгөөгүй. Манай үйлдвэрээс болж хүн хордсон гэж гүтгэж байна. Би энэ талаар шүүх, холбогдох байгууллагаар явж шалгуулна”гэсэн хариу өглөө.
Энэ үеэр Баянзүрх дүүргийн 11-р хорооны оршин суугч Т.Батцэнгэл “Би гурван хүүхэд болон ээж, аавтайгаа амьдардаг. “Заламт гол” ХХК ажиллаж эхэлснээс хойш манай гурван хүүхэд хордсон нь үнэн. Олон газар шинжилгээ өгч явлаа. Анх хүүхдийн маань хамраас их хэмжээний цус гоождог байсан. Одоог хүртэл үе үе цус нь гоождог. Хүүхдүүдийн маань бие хэцүү л байгаа. Яагаад заавал хүн, амьтан явдаг ийм газар хортой үйлдвэр байх ёстой юм” гэлээ.
 
“Монголын хог хаягдлыг дахин боловсруулах үндэсний холбоо” ТББ-ын удирдах зөвлөлийн гишүүн Д.Батжаргал

Монгол Улсад жилдээ 600, 700-аад мянган тээврийн хэрэгсэл явж байна. Үүнээс байнгын хаягдал аккумулятор гардаг. Монгол Улсад харт тугалганы 1000 гаруй тонн хог хаягдал гардаг. Монголд ганцхан байгаа “Заламт гол” ХХК-ийн үйлдвэр нь аюултай хог хаягдал буюу хүхрийн хүчлийг нь саармагжуулаад эцсийн бүтээгдэхүүн болгоод “Эрдэнэт” компанируу нийлүүлдэг. Хэрэв энэ үйлдвэрийн үйл ажиллагааг зогсоох юм бол жилдээ гарч байгаа 1000 тонн аккумуляторыг хэн хариуцах юм. Эдгээр хүмүүс хоосон улс төр хийхээ болих хэрэгтэй. Ашиг сонирхлын зөрчил явж байна гэж би харж байна.

+ There are no comments

Add yours