АНУ-ын Хөгжлийн агентлагийн төлөөлөгчидтэй хүмүүнлэгийн болон өвс тэжээлийн тусламж үзүүлэх талаар ярилцжээ

ОБЕГ

АНУ-ын Хөгжлийн агентлагийн төлөөлөгчид УОК-ын Шуурхай штабын үйл ажиллагаа болон өвөлжилтийн нөхцөл байдалтай танилцлаа.

Улсын хэмжээнд энэ сарын 10-ны байдлаар 190.8 мянган өрхийн 64.7 сая толгой мал өвөлжиж байгаа бөгөөд өнгөрсөн оны арванхоёрдугаар сарын 20-ны өдрийн байдлаар 18 мянган өрхийн 7 сая гаруй мал сум болоод аймгийн отрын бүс, хилийн зурваст оторлож байгаа юм.

Засгийн газрын 286 дугаар тогтоолын дагуу зудын байдалд үнэлгээ хийхэд нэгдүгээр сарын 10-ны байдлаар

• найман аймгийн 18 суманд төмөр буюу шилэн зудын,
• 16 аймгийн 85 суманд цагаан зудын,
• 16 аймгийн 75 сум цагаанаар зудархуу нөхцөл үүссэн байна.

Энэхүү нөхцөл байдалтай холбогдуулан Засгийн газар, УОК-оос холбогдох шийдвэрүүдийг гаргаж, хариу арга хэмжээг хэрэгжүүлэн ажиллаж байгааг энэ үеэр танилцууллаа.

Өвөлжилтийн нөхцөл байдал хүндэрсэн энэ цаг үед хэрхэн хамтран ажиллах, малчдад өвс тэжээлийн болоод хүмүүнлэгийн тусламж олгоход дэмжлэг үзүүлэх талаар харилцан санал солилцлоо гэж Онцгой Байдлын Ерөнхий Газраас мэдээлэв.