Л.Оюун-Эрдэнэ: Монгол Улс цааш хөгжье гэвэл нүүрс, зэс дагасан мафийг ил болгохоос өөр сонголтгүй

Т.Аюурсайханыг Засгийн газрын гишүүнээс чөлөөлөх асуудлыг хэлэлцэж байна. Захирамжийг Ерөнхий сайд Л.Оюун-Эрдэнэ танилцууллаа. Түүний хувьд ХНХ-ын сайдын албан тушаалаасаа чөлөөлөгдөх хүсэлтээ энэ оны хоёрдугаар сарын 7-нд гаргаж байсан билээ.

Л.Оюун-Эрдэнэ: “Монгол Улсын нийт экспортын 93 гаруй хувь нь уул уурхайн 4 бүтээгдэхүүн, тэр дундаа нүүрс, зэсийн экспорт дээр тогтдог. Шулуухан хэлэхэд Монгол Улс нүүрс, зэс гэсэн хоёр том бүлэглэлтэй болсон байна. Бүгдийг нь худалдаж авч, банкаар дамжуулж, улстөрийн барьцаалах гэсэн хэсэг нөхдүүд гарч ирсэн. Өнгөрсөн хугацааны бүх хөрөнгийг нь гаргаж, шүүхийн томилгоонд нөлөөлсөн, нууц биш. Ордонд бус эргэн тойронд байгаа байшинд шийдвэр гаргадаг. Зарим төрийн албан хаагчид архи хундагалдаг л ажилтай болсон ийм л нөхцөл байдал руу улс маань орчихсон байна.

• Монгол Улс хэрэв цааш хөгжье гэвэл нүүрс, зэс дагасан мафийг ил болгохоос өөр сонголтгүй. Тавантолгой дагасан багц арга хэмжээнүүдийг эдийн засагт гарч байгаа мэдээллүүдтэй нь харьцуулж хараарай. Эдийн засгийн өсөлт, төсвийн давсан биелэлтийг хараарай. Ийм хэмжээний далд эдийн засаг байсан гэсэн үг. Одоо ч амаргүй байна. Биржээр нүүрсээ зарахад хүндрэл гарч байна. Хил дамнасан зарим нэг компанийн эрх ашиг зөрчигдөж байна. Гэвч бид ингэж байж л асуудлаа цэгцэлнэ. Цаашид эдийн засгаа солонгоруулна. Гэхдээ ойрын 10-15 жилийн хугацаанд энэ хоёр бүтээгдэхүүн ил тод бус байвал шударга ёс, улстөр ярихад туйлын хүнд болно. Тиймээс үүнийг өөрчлөх ёстой” гэв.
• Т.Аюурсайханы хувьд прокуророос яллагдагчаар татагдсан. Үзэл санааг маань дэмжиж өөрийн хүсэлтээр ажлаа өгөхөө илэрхийлсэн. Өмнө нь Засгийн газрын хуралдаан болон Бүлгийн хурал дээр ямар нэгэн хэрэгт холбогдвол шууд ажлаа өгөөд шалгуулаарай. Ингэж гэмээнэ аалзны тор шиг хэрсэн авлигачдын сүлжээг тасална. Тэр цагт эрхзүйт төр, эгэл жирийн бизнесийн чөлөөт өрсөлдөөний тухай ярих хэмжээний болно” гэв.