БНСУ-ын шүүхээс орон сууц шатаасан Монгол улсын иргэнд тэнсэн харгалзах ял оноожээ

Талийгаач эмээгийнхээ дурсгалд зориулж 108 зул өргөж байгаад гал алдан, оршин суудаг орон сууцаа тэр чигээр нь шатаасан монгол иргэнд БНСУ-ын шүүхээс тэнсэн харгалзах ял оноожээ.

Тодруулбал, санамсаргүй гал алдсан хэрэгт яллагдагчаар татагдаад байсан Монгол Улсын иргэн “А”-д Инчоны дүүргийн шүүх тэнсэн ял оноосон болохоо өнөөдөр мэдэгдсэн байна.

33 настай “А” нь энэ оны 7 дугаар сарын 25-ны 21:30 цагийн орчимд Инчон хотын Намдон дүүрэг дэх орон сууцдаа гал алдаж, эд хөрөнгийн хохирол учруулжээ. Тэрбээр өмнөх өдөр нь нас барсан эмээгийнхээ дурсгалд зориулж 108 зул асаасан бөгөөд санамсар болгоомжгүй байдлаас нь болж галын дөл хана, тааз руу тархсан байна.

Азаар, галын улмаас хүний ​​амь нас эрсдээгүй хэдий ч “А” болон хөршийнх нь гэр тэр чигтээ шатаж, 90 сая воны эд хөрөнгийн хохирол учирсан аж.

Инчоны дүүргийн шүүхээс “А нь үйлдсэн хэргээ хүлээн зөвшөөрч, харамсаж байгаагаа илэрхийлсэн бөгөөд хохирлыг барагдуулахын тулд хүчин чармайлт гаргаж байгаа. Түүний хэргийн нөхцөл байдал ба анхны тохиолдол гэдгийг нь авч үзсэн” гэж тэмдэглэжээ.

Эх сурвалж: NEWSIS