Г.Цэрэндаваа: Олон улсад Англи хэлний багшаар ажиллах эрхтэй болсон

Худалдаа, үйлдвэрлэлийн их сургуулийн Гадаад хэлний тэнхимийн ахлах багш Г.Цэрэндаваатай ярилцлаа.  
–Сайн байна уу. Таныг англи хэлийг олон улсад заах эрх авсан гэж сонслоо?
-Тийм ээ. 
–Танд баяр хүргэе. Эхлээд ажилладаг сургуулиа танилцуулж болох уу?
-Болно. Худалдаа, үйлдвэрлэлийн их сургууль 1924 онд Хоршооны түр сургууль нэртэйгээр байгуулагдсан Монгол Улсын ууган 3 сургуулийн нэг юм. Өнөөдөр манай сургуулийн 97 жилийн ой тохиож байна. Өнгөрсөн хугацаанд Монголын санхүү эдийн засаг, худалдаа, нийтийн хоол, түүхий эд бэлтгэлийн зэрэг олон чиглэлээр 40 гаруй мянган мэргэжилтэн бэлтгэсэн  бахдам түүхтэй их сургуульд ажиллаж байгаагаараа бахархдаг. 
Би багш мэргэжлээр ажиллаад 29 жил болж байна. Худалдаа, үйлдвэрлэлийн их сургуулийн Гадаад хэлний тэнхимд англи хэлний багшаар ажиллаад 21 дэх намартайгаа золгож байна.  
–Та англи хэлний томоохон сертификат авсан талаараа тодорхой ярьж өгөөч?
-Өнгөрсөн хоёр жил Ковид-19 цар тахлын улмаас дэлхий нийтээрээ боловсролын салбар цахим сургалтад шилжлээ. Энэ хугацаанд өөрийгөө дайчлан Англи Улсын Засгийн газрын OFQUAL байгууллагаас албан ёсоор магадлан итгэмжилсэн, Англи хэлийг олон улсад заах эрхтэй TEFL зэрэг олгох дипломын хөтөлбөрт амжилттай суралцаж, олон улсад хүлээн зөвшөөрөгдсөн багшлах эрхтэй төгссөн. Англи хэл заах арга зүйн хувьд ур чадвараа сайжруулж, хэлний мэдлэгээ дээшлүүлэх  сайхан боломжийг надад олгосон өндөр үр өгөөжтэй хөтөлбөрт хамрагдаж, амжилттай төгссөндөө баяртай байна. 
–Танд дахин баяр хүргэе!
-Баярлалаа.
–Та Англи хэл сурах, хэлний мэдлэгээ хэрхэн дээшлүүлэх талаар оюутан, залууст зөвлөгөө өгч болох уу?
-Залуус юуны түрүүнд өөрт тохирсон гадаад хэл сурах арга барилыг эзэмших хэрэгтэй.  Жишээлбэл, шинэ үг хэллэг сурахад яаж сурвал илүү үр дүнтэй байна гэдгээ мэдэж авах нь чухал. Жагсааж бичээд олон дахин уншиж цээжлэх нь тохиромжтой байна уу, эсвэл уншлага хийх явцад илүү хурдан цээжлэгдэж байна уу гэх мэт өөрийгөө ажигла. Мөн гадаад хэл сурах үйл явц тасралтгүй байх нь зүйтэй. Нэг ч өдрийг хэлээ давтахгүйгээр өнгөрүүлэх хэрэггүй. Эцэст нь алдаа гаргахаас бүү ай гэж зөвлөх байна.